Autoa leku batetik bestera mugitzeko garraiobide soila da batzuentzat, baina hori baino gehiago ere bada beste hainbatentzat. Badira estatusarekin -edo hobe esanda estatus jakin batekin- lotzen dutenak, eta badira ibilgailuak askatasun indibidualarekin lotzen dituztenak ere. Orriotara ekarri ditugun lagunak autozaleak dira oso. Gogoko dituzte autoak -ezaugarri jakin batzuk dituztenak bereziki- eta gozatu egiten dute gidatzen. Gidatu eta gozatu, horixe egin dute Nurburgringera eginiko bidaian. Izan ere, autozaleen meketako bat da Alemanian dagoen automobilismo zirkuitu ikonikoa. Idotorben batu gara lagun taldeko kide batzuekin euren ibileren berri izateko.

Ingeniaria da ikasketaz Jon Garate Ondarre (Elgoibar, 1987), baina azkeneko bost bat urtean argazkilari freelance gisa ari da, arreta, denbora eta ahalegina benetan interesatzen zaizkion gaietan jarrita. Argazkia eta bideoa egiten ditu, eta biak uztartu ditu bere azken proiektuan ere. Urtarrilean, Jordanian izan zen errefuxiatu palestinarren kanpalekuetan dokumental bat grabatzen, baina askotarikoak dira bere lanak. Markinako Lea Artibai Lanbide Heziketako ikastetxean eskolak ematen ere ari da orain, eta handik bueltan batu gara berarekin, argazkilaritza ulertzeko duen moduaz aritzeko.