Txankakoako zubitik abiatuko da Idotorbeko igoera

Barren 2025ko urr. 8a, 17:30

Urtero legez, urriaren 12an jokatuko dute txirrindulari denboraldiari amaiera ematen dion Idotorbeko Igoera. Aurtengorako irteera eta helmuga puntuak aldatu behar izan dituzte.

Probaren egun eta ia ordu berean Errosarioko Amaren ezpata-dantza egingo dutela-eta, Kalegoen plazatik beharrean Txankakoako zubitik irtengo dira txirrindulariak, 12:00etan, ezpata-dantzako doinuek girotuta, bat egingo baitute bataren amaierak eta bestearen hasierak.

Julian San Juanen Oroimenezko probaren 33. edizioa izango da aurtengoa, eta parte hartzera deitu dute antolatzaileek. Elgoibarko Lagun Taldekoek jakinarazi dute 10:30etik 11:30era eman ahal izango dela izena Giza eskubideen parkean jarriko duten mahaian. Federatuek bost euro ordaindu beharko dute izena emateagatik eta federatu gabeek 12 euro. Parte hartzeko asmoa duten txirrindulariei Kalegoen plazatik ez igarotzeko eskatu diete, Santana kaletik edo Txankakoako zubitik joan daitezke izena ematera. Irteera puntua metro batzuetan aurreratu behar izan dutenez, helmuga marra ere beste horrenbeste atzeratuko dute.

Iazko edizioan 40 txirrindularik parte hartu zuten eta Aritz Esnaola mendaroarra eta Maite Urteaga zumaiarra izan ziren azkarrenak. Urteagak Idotorbeko aldapetan eman zituen lehen pedalkadak 2022ko igoeran; eta oraintsu egin du debuta profesionalekin, Laboral Kutxa-Euskadi taldearekin.

• Idotorbeko Igoera; azken urteetako irabazleak:

Kirola Elgoibar