Mikel Perez de Obanos eibartarrak irabazi du Idotorbeko Igoera

Barren.eus 2022ko urr. 12a, 12:29

Mikel Perez de Obanos txirrindulari eibartarra izan da azkarrena gaur jokatu duten Julian San juanen XXX. Oroimenezko txirrindulari lasterketan.

Iaz, Iker Eskibelek probako errekorra (12:48) ondu zuen urtean hirugarren postuan sailkatu zen Mikel Perez de Obanosek irabazi du 2022ko Idotorbeko Igoera. Txirrindulari eibartarrak 13 minutu eta 46 segundoan osatu du Kalegoen plazatik Idotorbe gainerainoko ibilbidea. Hala, iaz baino minutu erdi gehiago behar izan arren, garaipena eskuratu du. Iaz 13:11ko denboran egin zuen igoera. Eibar Txirrindulari Taldeko kidea da Perez de Obanos.

Atzetik aurrerako lasterketa eginez, proba hau bost alditan irabazitakoa den Iñigo Lariz elgoibartarra ailegatu da helmugara bigarren postuan, 13:59ko denborarekin. Unai Mugikak egin du hirugarren (14:16). Mugikak lasterketa buruan egin zuen igoerako zatirik handiena, metro batzuetako abantailarekin, baina azken kilometroan bere pareraino iristea lortu du Perez de Obanosek eta azken zatian atzean utzi du. Larizek ere azken metroetan gainditu du Mugika, ikusleak pilatzen diren igoerako azken metroetan, hain zuzen ere.

Guztira 27 lagunek hartu zuten parte Lagun Taldea txirrindulari eskolak denboraldiari amaiera emateko antolatzen duen proban. Emakume bakarra lehiatu zen, Maite Urteaga zumaiarra (19:29). Kadeteetan Eñaut Andres izan da azkarrena (19:24), Eneko Ortega (14:24) juniorretan, Iñaki Goenaga (14:33) Master kategorian eta Joxe Felix Iglesias (17:40) eta Tomas Arizaga (19:26) beteranoetan.