•Lazkanok garaipena eta Lendinezek errekorra
Iaz lortu zuen garaipena errepikatu du Iñigo Lazkanok (14:17) XVII. Julian San Juanen Oroimenezko San Pedrora txirrindulari igoeran. Aurreko urtean eginiko denbora hobetu duen arren, Iñigo Larizen errekorretik (13:21) urrun geratu da. Axier Latxeta sailkatu da bigarren postuan, 14:42 denborarekin, eta Azibar Iraolagoitia sartu da helmugan hirugarren postuan. Iñigo Lariz izan da lehen elgoibartarra (15:02), sailkapen nagusiko laugarren postuan. Larizek, gainera, rolleski proban parte hartu du bizikletakoa amaitu eta gero. Emakumezkoetan, bestalde, probako errekorra ondu du Ainhoa Lendinezek. 17 minutu eta 40 segundotan burutu du igoera elgoibartarrak. Sailkapeneko 28. postuan sailkatu da. Kadete mailako lehen sailkatua Iker Goikoetxea izan da eta Jon Ander Kortabarria, berriz, lehen gaztea. 23 urtez azpikoetan, Iker Mugartegi izan da onena. Azkenik, Jose Mari Fernandezek egin du denborarik onena 46tik 55 urtera artekoetan, eta Antonio Lendinezek 56 urtetik gorakoetan.
•24 lagunek egin dute rolleski proba
Bestalde, Morkaikok antolatutako I. Rolleski Igoeran Tolosako Joseba eta Imanol Rojo anaiek erakustaldia eskaini dute. Gazteenak, Josebak, 18 minutu eta lau segundotan igo zituen aldaka pikoak. Imanol ez da atzean geratu, baina anaiarengandik 40 segundora sartu da helmugan. Minutu batzuk pasa behar izan dira hirugarren sailkatuaren iritsiera ikusteko, Arkaitz Irureta elgoibartarrak 24 minutu eta 19 segundotan egin du 3,9 kilometroko ibilbide aldapatsua. Guztira 24 lagunek parte hartu dute estreinako San Pedroko Rolleski Igoeran. Eibarko Klub Deportibok, bestalde, Mausitxako gazta bat jaso du saritzat, kide gehien earri dituen taldea izateagatik.
