Aritz Esnaola eta Maite Urteaga irabazle Idotorbeko Igoeraren 32. edizioan

Barren 2024ko urr. 12a, 14:11

Aritz Esnaola eta Iker Lizarazu igoeraren azken metroetan. BARREN

40 txirrindularik hartu dute parte Julian San Juanen Oroimenezko 32. Idotorbeko Igoeran, eta Aritz Esnaola mendaroarra eta Maite Urteaga zumaiarra izan dira azkarrenak.

Iazkoaren antzerako giroarekin jokatu dute gaur, urriak 12, Idotorbeko igoera; udazkeneko egun eguzkitsu eta haizetsuarekin. 40 lagunek eman dute parte hartzeko izena, tartean emakume bakarrak.

Probako lehen metroetatik erritmo bizia jarri du Iker Lizarazuk eta deposito paretik ere tropelari aurrea hartuta igaro da. Atzean, tropelaren babesean egin dituzte igoerako lehen metroak parte hartzaile gehienek. Lizarazuk tarte handia atera die jarraitzaileei lehen ia hiru kilometroetan, baina nekea igartzen hasi da eta ezin izan dio hasierako erritmo biziari eutsi. Atzetik aurrera eginez, bere pareraino ailegatu da Aritz Esnaola, 19 urteko mendaroarra. Helmugarako kilometro bat falta zela iragartzen zuen karteltxo paretik pasa direnean harrapatu du Esnaolak Lizarazu, eta elkar zainduz egin dituzte hurrengo metroak. Ikusleak batzen diren lekuan eraso bortitza jo du Esnaolak eta bakarrik egin ditu helmugara arteko azken metroak, zaleen txalo eta animo artean. 14 minutu eta 5 segundoan osatu du igoera. 22 segundora sartu da helmugan Lizarazu, 14:27ko denborarekin. Hasier Murua sailkatu da hirugarren postuan (14:47).

Bigarren garaipena eta errekorra Maite Urteagarentzat

Maite Urteagak igoera aparta osatu du eta 16:25eko denborarekin 13. postuan helmugaratu da. Duela hiru urte hasi zen txirrindularitzan eta 2022ko Idotorbeko Igoeran ere hartu zuen parte. Gaur hiru minutuan ondu du orduan egin zuen denbora eta errekorra ondu du gainera, aurrez Maite Maiorak zuen errekorra ia minutu batean onduz.

Elgoibarko Lagun taldea txirrindulari Eskolak denboraldiari amaiera emateko antoolatzen duen probako errekorra Iker Eskibel eskoriatzarrak dauka: 12 minutu eta 48 segundo.

Maite Urteagak hiru minutuan ondu du duela bi urte, bere lehen parte hartzean, eginiko denbora.

Aurten txosna ere jarri dute antolatzaileek Idotorben eta eskerrak eman dizkiete Idotorbe San Pedro Elkartekoei emandako laguntzagatik.

Manifestazioa, domekan, urriaren 13an

Dena ez da, baina, poza txirrindularitzan. Idotorberako Igoera jokatu biharamunerako, domekarako, manifestazioa antolatu baitu Gipuzkoako Txirrindularitza Federazioak Donostian, Gipuzkoan lasterketak antolatzeko jartzen dizkieten oztopo guztiak salatu eta konponbidea eskatzeko. Elgoibarko Lagun Taldeak eta Mendaroko Txirrindulari Elkarteak bat egin dute manifestazioarekin eta parte hartzera deitu dituzte txirrindulari eta zaleak. 11:00etan abiatuko da manifestazioa belodromotik eta udaletxe parean bukatuko da. Ibilbidea oinez zein bizikletaz osatu ahal izango dela aurreratu dute Federaziotik eta, ahal duenari bere taldeko edo klubeko mailota jantzita eramateko eskatu diote.

• Idotorbeko Igoera; azken urteetako irabazleak:

Kirola Elgoibar Mendaro

Erlazionatuak

2024ko Idotorbeko Igoera, irudietan

Barren urr 13 Elgoibar