Josu Uriarte izan da, aurten ere, San Pedroko bizikleta igoerako
irabazlea (14:00). Markinarrak 15 segundo eta minutu bateko aldea atera
zien Iñigo Ortuosteri eta Jose Mari Fernandez “Suso”ri; bigarren eta
hirugarren sailkatuak, hurrenez hurren, Idotorbe-San Pedroko helmugan.
Nabarmentzekoa da Mikel Lopezosaren, jubenil mailan diharduen
txirrindulari elgoibartarraren, bosgarren postua, 15:16 denborarekin.
Guztira 35 lagunek parte hartu zuten euri-lanbro artean jokatu zen
igoeran. (sailkapenak eta argazkiak dauzka)
San Pedroko aldapa pikoei neurria hartua diela erakutsi zuen atzo, Pilarika Egunean, Josu Uriarte markinarrak. Iaz (2008an) baino 10 segundo gehiago behar izan zituen Plaza Handia eta Idotorbe arteko lau kilometroko igoera gogorrean, baina errepide gainean nagusi dela frogatu zuen, beste behin ere. Eta aldea handiagoa izango zatekeen, beharbada, matxura txiki baten erruz, irteeran segundo batzuk galdu izan ez balitu. Berehala egin zuen bat, ordea, hasiera-hasieratik lasterketaren burua hartu zuten lau txirrindulariekin. Parera ailegatu eta atzean laga zituen, gainera, ibilbidearen erdialdera. Helmugan 15 segunduko aldea atera zion igoera aparta egin zuen Iñigo Ortuoste elgoibartarrari. Ortuostek, berriz, 45 segundoko aldea atera zion Jose Mari Fernandez “Suso” beteranoari. Bi hauek lehia estu eta ikusgarriak eskaini dituzte San Pedroko bizikleta igoera zein Karakateko igoeran azken urteetan. Iaz, esaterako, soinez soin iritsi ziren biak Idotorbeko helmugara. Laugarren postuan Azibar Iragagoitia mendaroarra sailkatu zen eta bosgarren postuan, berriz, Mikel Lopezosa gaztea.
