55 txirrindularik hartu zuten parte zapatuan Julian San Juanen Oroimenezko 22. San Pedroko igoeran. 55 lagunek bai, baina 54 bizikleten gainean. Izan ere, Mikel Lopezosa eta Mikel Hernandezek tandem bizikleta baten gainean egin zuten igoera. Ez ziren batere gaizki moldatu gainera, sailkapen nagusiko 21. postuan sailkatu ziren-eta 17:12 denborarekin. Txirrindularitzan lehiatzeari laga dio aurten Lopezosak, eta, agur modura, denboraldiko azken lasterketa modu berezian egitea erabaki zuen. Pedalei eragiteko laguntzat ez zuen edonor aukeratu, iaz igoera irabazi zuen Mikel Hernandez plaentxiarra, hain justu ere.
•Anaien nagusitasuna
Bitxikeriak alde batera lagata, Gonzalez anaiak izan dira jaun eta jabe aurtengo igoeran. Anaia gazteena, Iban ailegatu zen lehen postuan azken metroetara, baina anaia zaharrena (Jorge) atzetik zetorrela jakin zuenean zain gelditzea erabaki zuen eta biak batera helmugaratu ziren. Epaileek, baina, Jorge jo zuten irabazletzat, haren bizkletako gurpilak lehenago gurutzatu zuelako helmugako marra. Hamabost minutu justu behar izan zituzten biek Kalegoen plazatik Idotorbera dauden 3,8 kilometroak egiteko. (Iñigo Larizek dauka probako errekorra, 13:21). Hirugarren eta laugarren sailkatuak ere, Ruben Merino eta Jorge Cordon, hurrenez hurren, denbora berean sartu ziren helmugan, 15:11 denborarekin.
•Cintia Martinezen garaipena roleski igoeran
Sei lagunek parte hartu zuten Idotorbeko rolski igoeran, eta Cintia Martinez iruñearra izan zen guztietan azkarrena, 26 minutu eta hogeita hamar segunduko denborarekin. Iker Leonardo elgoibartarra salkatu zen bigarren postuan (26:42) eta Arkaitz Irureta hirugarren postuan.
- Informazio osoagoa eta sailkapenak: pirukeriak.blogspot.com
ARGAZKIAK:
*Goiko argazkia: Urgazi Triatloi Taldea.