Hasi zuten egun berean izango da itxiera, irailaren 18an (eguena). Izan ere, egun esanguratsua da irailaren 18a herriko Lanbide Heziketaren historian: Elgoibarko Udalak 1899ko irailaren 18an sinatu zuen Lanbide Heziketako eskola sortzeko baimena ematen zuen agiria. Ordutik 125 urte igaro direla ospatu dute azken ikasturte akademiko honetan.
- 125. urteurrenari buruzko erreportajea BARREN astekarian 1340. zenbakian
Itxiera ekitaldia Herriko Antzokian egingo dute, eta antolatzaileek aurreratu dutenez, Elgoibarko lanbide heziketako ikasle, irakasle eta langile jubilatuek hartuko dute parte.
11:30-12:00 bitartean Herriko Antzokiko sarreran photocall-a egingo dute gonbidatu guztiekin. 12:00etatik aurrera honako ekitaldien osatuko dute ekitaldia: IMH eta Meka LHIIko zuzendarien ongietorria, 125. urteurreneko bideo oroigarriaren emanaldia, Eusko Jaurlaritzako Lanbide Heziketako Sailburuordearen hitzaldia, Elgoibarko lanbide heziketako komunitateari aitortzak, alkatearen agurra eta talde argazkia.
125. urteurreneko batzordeak eskerrak eman dizkie Elgoibarko Udalari, urteurrena babestu duten enpresei (DanobatGroup, BESA, Geminis Lathes babesleak, eta Berkoa, Mancisidor, Ger, AVS, Nordplastic, Telleria, Laboral Kutxa laguntzaileak), Makina Erremintaren Museoari, Elgoibarko makina erremintaren historia zaleei, eta Elgoibarko lanbide heziketa osatzen duten pertsona, ikastetxe, enpresa eta erakunde guztiei.
"Lanbide Heziketaren, enpresaren eta erakundeen ahalegin eta dedikazio bateratua izan da, eta izango da, gure gizartearen funtsezko motorra, teknologiaren eta berrikuntzaren aitzindari izatera eramango gaituena", adierazi dute.
Urteurren urtearen errepasoa
Joan den ikasturtean urteurrenaren harira antolatutako ekitaldi nagusiak ere aipatu dituzte, besteak beste, honakoak:
- Elgoibarko filatelia elkartekoek antolatutako erakusketa berezia.
- BIEMH Fabrikazio Aurreratuaren Nazioarteko Azokaren aitortza.
- San Bartolome jaietan Lanbide Heziketako ordezkariek iaz bota zuten txupinazoa.
- Urteurreneko hasiera ekitaldi ofiziala.
- lanbide heziketako jatorri-historiari buruzko kafe-tertulia.
- IMH eta Mekako ikasleekin ospatutako Don Bosko Eguna.
- IMH eta Mekako ikasle ohientzat eta enpresentzat egindako ate irekien jardunaldia.
- Udalak etorkizuneko estrategiari buruz antolatutako work-cafe-a.
- 125. urteurrenari buruz IMH Campusen egin zuten UIK-EHU udako ikastaroa.