LaRoita erronka guztietan moduan, jende ugari batu da Karakate gainean, gazteak ia denak eta aurrekoetan baino emakume gehiago, nabarmen. Sasiain eta Burunza animatzeko pankartak eraman dituzte mendi gainera bataren zein bestearen koadrilakoek.
Gazte ia denak mugikorrei begirik kendu gabe zeuden gailurrean, baina ez denporapasan, probaren zuzeneko emisioari adi-adi baizik. Ohitura duten legez, Youtubetik zuzenean eman dute proba; hasieratik bukaerara, eta hiru esatariren komentarioekin: Unai Astiazaran, Gartxot Fidalgo eta Gorka Iriondo.
Igoeraren azken zatira elkarren segidan ailegatu dira erronkariak eta emozioa areagotu du horrek. Nerea Sasiain agertu da aurrena jendartera, eta ikusle andanaren erditik egin ditu azken metroak, txalo eta animo artean. BARRENi emandako elkarrizketan esan zuen moduan, "Zegama-Aizkorri txiki hori" barrutiki bizitzeko aukera izan du. Sasiainek ordu bat, 44 minutu eta 52 segundoan osatu du erronka. Burunzak 36 segundu gehiago behar izan ditu (01:45:28). Tontorrera ailegatzearekin bat, besarkada luzea eman diote elkarri. Emozioak askatzeko beharra zuten, entrenamenduetan azken hilabeteetan egindako ahaleginaren amaiera baitzuten. Batak zein besteak lagun mordoa eskertu dituzte LaRoitakoek Karakate gainean egin dieten elkarrizketan.
Festagiroa Maalan eta plazan
Txapelak falta zituztela-eta, Maalan egin dute sari-banaketa ekitaldia, eta garaikurrak banatu ondoren hasi da erronkaren bigarren zatia: festa. Mauxitxa txarangarekin hasi dute kalejira eta poteoa, eta Kalegoen Plazaraino joan dira, han bazkaldu baitute. 450tik gora lagun elkartu dira bazkaritarako. Beroari aurre egiteko eguzkitako handi batzuk inguratu behar izan dituzte. Arratsaldean jarraitu du festak, karropoteoarekin eta kontzertuekin (ikus egitaraua).
*Argazkiak: BARREN eta Ane Gonzalez.
Lotura duten albisteak:
- LaRoita erronkako lehiakideak aurrez aurre: Ainara Burunza eta Nerea Sasiain (2025-07-03)
- La Roita: Kirol erronka baino gehiago (2024-06-25)
- Iker Odria, txapeldunen txapelduna La Roita erronkan (2024-06-22)
- La Roita erronkako txapeldunak, aurrez aurre (2024-06-14)
- Ion Fernandezek irabazi du LaRoita erronkaren hirugarren ekitaldia (2024-07-01)
- Ioritz Leiaristik irabazi du LaRoita apustua eta errekorra ezarri du gainera (2024-07-02)
- Odriak irabazi dio De La Aradari ikusmin handia sortu duen erronka (2024-06-26)
