Joan zen astean egin zituzten karga ahalmen frogak, eta dagoeneko bukatu dute zubia berritzeko lanen bigarren fasea. Azken urteotan herrian egin duten obrarik garrantzitsuenetarikoa izan dela nabarmendu dute Udaletik, eta lan horri esker, herrigunetik Urazandi auzorako irisgarritasuna "bermatuta" geratu dela gaineratu.
Zubi berriak lehengoa ordezkatu du, eta egindako lanek egitura nagusia berritzea ekarri dute: zubiaren egonkortasuna eta iraupena sendotu dituzte habe berrien bidez, eta pasabidearen irisgarritasuna eta erabilera hobetzeko neurriak hartu dituzte. Zubiaren gehienezko altuera mantentzeko, zubi zaharraren zutabe nagusia berreskuratu dute, berriaren oinarri gisa. Gainera, azpiegiturak ur-drenaje sistema berritua eta azalera berrituak ditu, "erosoagoa eta seguruagoa izan dadin".
Azken bi faseak falta dira egiteko
Zubia irekitzearekin batera, autobus geltokia lehengo lekura aldatuko dute lekuz, eta ostiraletik aurrera, Urazandiko zubiko autobus geltokian hartu beharko da autobusa.
25 hilabete pasatu dira lanak hasi zituztenetik eta ia bi milioi euroko kostua izan du. Obraren hirugarren eta laugarren faseak 2027 eta 2028. urteen artean egingo dituzte. Udaletik azaldu dutenez, hirugarren fasean Errezabal egoitza izango dena lotuko dute zubiko pasabideetako batetik. Lanok 2027 eta 2028 artean egitea aurreikusten dute. Errezabal egoitza hartuko duen lanek baldintzatuko dituztela epeak zehaztu dute. Azken fasean egin beharreko lana igogailuaren parera iristen den arrapala bat ipintzea izango litzateke, autobus geltokiaren gainean geratuko litzatekeena.
Lotura duten albisteak:
- King-kong zubia 11 hilabetez egongo da itxita (2024-10-04)
- King Kong zubia berritzeko lanen bigarren fasea hasi dute, eta 14 hilabete iraungo dute (2024-06-25)
- King-kong zubiaren karga ahalmena neurtu dute (2024-05-09)
- King Kongeko zubia izango dena erakutsi du Udalak (2024-02-08)
- Astelehenean hasiko dute King Kong zubia berritzeko obraren lehen fasea (2023-09-14)