Elgoibarko Udal Gobernuak 21,5 milioi euroko aurrekontu proiektua aurkeztu du 2025erako, aurtengoa baino %10 txikiagoa

Barren 2024ko aza. 13a, 16:43
Deskargatu Info Ahotsak :
es en fr

Elgoibarko Udal Gobernuak 21.486.483,51 euroko aurrekontua proposatu du 2025erako, aurtengo hasierako aurrekontua baino %10,71 txikiagoa. Arduradunek gogoratu dute aurtengo urterako aurrekontua (24.062.902 eurokoa) "inoizko aurrekontu handiena" izan dela, %24 hazi zelako 2023. urtekotik. 

Udal Gobernutik jakinarazi dute aurrekontu proposamena opozizioko taldeekin partekatu dutela, eta hainbat bileratan lantzen ari direla, ekarpenak jasotzeko eta proposamen berriekin aberasteko. Azaroko udalbatzarraren osoko bilkuran aurkeztuko dute proposamena.

2025erako aurrekontuari begira nabarmendu dute "estrategikoki banatuta" dagoela, funtsezko arloetan eragina maximizatzeko. ‘2023-27: bizi, maitatu, egin Elgoibar Plan Estrategikoa’ oinarri hartuta ondu dutela zehaztu dute. Baliabideak honela banatzea proposatu dute: 

  • Antolaketa Arloa: 6.076.677,50 euro (%28,28)
  • Herrigintza: 7.059.755,83 euro (%32,86)
  • Lurralde: 8.349.652,76 euro (%38,86)

Aurrekontuaren barruan, Gizarte Ongizate saila %9 handitu dute, eta horri esker, etxez etxeko laguntza-zerbitzuak, gizarte-larrialdietarako zerbitzuak eta adinekoentzako baliabideak hobetzeko asmoa azaldu dute. Kultura arlorako ere %3ko igoera proposatu dute, eta Euskara Sailerako, berriz, % 2koa. Gazteriaren arloan, bestalde, %5eko jaitsiera egongo litzateke, 2024an egin zuten ludoteka berriko inbertsioak ez duelako baliabide handiagorik beharko datorren urtean. Era berean, ingurumenarekiko eta energia berriztagarriekiko konpromisoa hartu dutela azaldu dute, alor horretarako inbertsio zehatzak proposatuz. 

Aurrekontu proposameraren berri eman duten Elgoibarko Udal Gobernuko ordezkariak: Ariana Nogales, Atsegin Uzuriaga eta Maialen Gurrutxaga.

Diru sarrera handiagoak

Udalak, bestalde, diru-sarrerak handitzea aurreikusten du 2025ean, hainbat baliabideren bidez: Zuzeneko zergak, ondasun higiezinen, ibilgailuen eta jarduera ekonomikoen kontribuzioak barne %2 handituko dira. Era berean, tasek eta bestelako zergek %12ko igoera izango dute, eta hiri-hondakinen bilketa izango da atal honetan pisu handiena izango duen partida, guztiaren % 65a izango baita. Transferentziei dagokienez, Gipuzkoako Foru Funtsak % 5,77 egingo du gora, eta 10.335.000 eurora iritsiko da. Kapital-transferentziek, berriz, % 13ko gehikuntza orokorra izango dute. Autonomia Erkidegoaren (+%51) eta Gipuzkoako Foru Aldundiaren (+%39) babesa ere nabarmendu dute.
Udal Gobernuak dio aurrekontu honek elgoibartarren egungo beharrei erantzuten diela, "udalerri irisgarriagoa, jasangarriagoa eta kohesionatuagoa eraikiz". 

2025erako inbertsio nagusiak

  • King-Kong zubia berritzeko hurrengo faseetako lanetarako 643.541,64 euroko aurrekontu esleituko dute 2025erako.
  • Bide publikoen konponketa: 200.000 euro erabiliko dituzte kaleak eta errepideak hobetzeko eta mantentzeko.
  • Udal-komunitate energetikoa: 140.397,92 euroko kontu-sailarekin, Udalak udal-komunitate energetikoa sortzeko lehen faseari ekingo dio.
  • Sallobente-Ermuaran auzoko etxeak ur-hornidura orokorrera batzeko: 400.000 euro.
  • Landa-eremuetako lanak egiteko: 210.000 euro.
  • Gizarte Zerbitzuak bultzatzeko: 35.000 euro. Zerbitzuen kalitatea eta irismena hobetzeko erabiliko dute diru hori.
  • Haur-parkeak hobetzeko eta berritzeko: 40.000 euro. 

 Gainera, hainbat proiektutarako kredituak konprometitu dituztela aurreratu dute, esaterako, Errezabal egoitzako aparkalekua eta Sigma auzoko bizilagunentzako etxebizitzak birgaitzeko dirulaguntzak. Merkatu Plazan anbulatorio berria eraikitzeko lanak hasiko dituztela ere gogora ekarri dute. 

∞Lotura duten albisteak:

Udala Elgoibar