Karakateko Igoeraren 31. ekitaldia jokatuko dute zapatuan

Barren 2025eko azaroaren 13a
Deskargatu Info Ahotsak :
Español English Français Català Galego

Zapatuan jokatuko dute Karakateko Igoera. 11:00etako kanpaiak jotzeaz batera irtengo dira korrikalariak Kalegoen plazako frontoitik, eta bakoitzak nahi duen bidetik, Karakate puntaraino igoko dira.

Partaideek tontorrean dagoen puntu geodesikoa ikutzean hartuko dituzte denborak. Lau kilometroko ibilbidean 700 metro inguruko gorako desnibel positiboa gainditu beharko dute (hona ohiko ibilbidearen track-a). Lehenengo gizonezkoak eta emakumezkoak, eta lehenengo emakume zein gizonezko elgoibartarrek izango dute saria, eta baita aurpegi onenarekin iristen den korrikalariak ere. Horrez gain, sari berezi bat ere banatuko dute: Morkaikokoek denborari begira saltaka egiten ez duten saltakariak ere Karakateko Igoeran parte hartzera animatu nahi dituzte, eta lehen sailkatuaren denbora bikoizten duen parte-hartzailea ere sarituko dute. "Denborara gehien hurbiltzen dena, pasatu gabe", zehaztu dute. 

Izen ematea doakoa da eta egunean bertan eman ahal izango da izena Kalegoen plazan, 09:30etik 10:45era bitartean. Antolatzaileek 125 partehartzailetan jarri dute muga.
Probako araudiari buruzko xehetasun guztiak morkaiko.eus webgunean

Iazko Karakateko Igoeran Guillermo Ramos, kilometro bertikaletako Espainiako txapelduna, eta Maria Ordoñez izan ziren tontorrera iristen lehenengoak. 92 lagunek bukatu zuten proba.

Probako errekorra Iban Muruak ezarri zuen 2017an: 26 minutu eta 17 segundo. Emakumezkoetan Maite Maiorak du errekorra, 2016an ezarria: 31 minutu eta 37 segundoan.

•Azken urteetako irabazleak:

Kirola Elgoibar