88 lagunek hartu dute parte gaur goizean jokatu den Karakateko 22. Igoeran, iaz 119 parte hartzaile izan ziren. Lasterkariak Kalegoen Plazatik Karakateko tontorrerantz abiatu dira 11:00etan puntuan. Soken edo egurraren bidetik egin dute gehienek gorako bidea eta Iñigo Lariz eta Julen Aranguena izan dira azkarrenak. Bata bestearengandik hurbil egin dute igoera osoa eta elkarrekin iritsi dira azken metroetara ere. Jendetza zuten zain tontor inguruan eta biak elkarrekin azaltzen ikusi dituztenean zoramena izan da. Aspaldian ez da horren amaiera esturik izan Karakateko igoeran. Goiko bideoan ikus daitekeen moduan, parez-pare egin dituzte azken metroak ikusleen oihu artean eta esprint estu baten ostean, Iñigo Larizek ikutu du lehen postuan Karakateko puntu geodesikoa.
Larizek 28 minutu justuan osatu du igoera, iaz ezarri zuen errekorra baino 23 segundo gehiagoan, alegia. Iban Murua elgoibartarrak ere igoera bikaina egin du eta hirugarren postuan sailkatu da, 28:32ko denborarekin. Beste elgoibartar gazte bat, Ioritz Konde, sailkatu da laugarren postuan (29:49) eta Jorge Gonzalez izan da bosgarren (29:49). Lehen bost sailkatuek 30 minutuz azpitik egin dute igoera.
•Lendinez errekorretik gertu
Emakumezkoetan errekorretik gertu gelditu da irabazlea. Ainhoa Lendinez elgoibartarrak 34 minutu eta 34 segundoan osatu du igoera, iaz Nahia Quincocesek ezarritako errekorra (34:21) baino 13 segundo gehiago. Naomi Revert elgoibartarra sailkatu da bigarren postuan (41:48) eta Morkaiko mendi taldekoek berari eman diote aurpegirik onenaren saria ere.
ARGAZKIAK (barren.eus, Eñaut Izagirre, Morkaiko eta Iñaki San Martin Soarte).
•Azken urteetako irabazleak:
- 2014an Iñigo Lariz
- 2013an Iñigo Lariz
- 2012an Iñigo Lariz
- 2011n Oier Ariznabarreta
- 2010ean Oier Ariznabarreta
- 2009an Oier Ibarbia
- 2008an Josu Arregi
- 2007an Iñigo Lariz
- 2006an Aritz Kortabarria
∞Lotura duten albisteak:
-
Karakateko igoerako errekorrak ondu dituzte Inigo Larizek eta Nahia Quincocesek (2014-11-15)
- Iñigo Larizek garaipena eta errekorra Karakateko 20. igoeran, 27:39 (2013-11-16)
- Iñigo Larizek irabazi du Karakateko igoera eta errekorretik hiru segundora geratu da (2012-11-17)
- Karakateko Igoera barrutik ezagutu nahi? (2011-11-22)
- 28 minutu eta 17 segundo, Karakateko Igoerako errekor berria ezarri du Oier Ariznabarretak(2011-11-19)
- Karakatera antxintxika eta aurpegi onarekin gainera!
- Jakin nahi duzue Karakateko Igoeraren historia? (2007-11-16 elgoiBARREN.net)