Hamasei urtetik gorakoen probarako ehun lagunek eman dute izena eta Elgoibar Ikastolako beharginak izango dira horietako hogei. Gainerakoak 2009. eta 2018. urteen artean jaiotako neska-mutilak izango dira.
Aurten, estreinakoz, Haur Hezkuntzako neska-mutilek ere egingo dute antxitxika, 10:00etatik aurrera. Horren ostean hasiko dira urteroko ohiko lasterketak, adinaren arabera banatuta, 10:30etik aurrera. 09:30etik 10:20ak bitartean kamisetak eta dortsalak eskuratzeko aukera izango dute izena emanda dauden LH1etik gorako partaideek.
Herri bazkarian 250 lagun
Elgoibar Ikastolak urtean zehar kalean antolatzen dituen ekimenak bereziak izaten ari dira aurten, urrian Kilometroak jaia izango dela-eta. Ukitu berezia eduki zuten santa eskeak, Euskal Inauteriek edota Pilota Egunak, eta soka bererik, Jose Gurrutxaga krosa ere ohi baino jantziagoa dator, kirola, festa eta elkartasuna uztartuko dituela aurreratu baitute Ikastolatik. Estreinakoz herri-bazkaria antolatu dute, eta 48 ordutan agortu ziren bazkarirako txartelak. Elizpean egingo dute bazkaria lasterketa guztiak amaitzean, 14:30etik aurrera.
Jolasgunea, Bolatokian
Ume txikienentzako txoko edo jolasgune bat ere prestatu dute, 0-5 urte bitarteko umeentzakoa, hain zuzen. 10:30etik 13:30era egongo da erabilgarri Bolatokiko parkean.
