Mendaron euskararen erabilerak izandako apaltzea ikusita, herriko haur eta nerabeei erreferente euskaldunak gerturatzeko sortu zuen Ereduegarri egitasmoa iaz In Leike kultur elkarteak, Mendaroko Udalaren laguntzarekin.
Egitasmo horren baitan, Aitziber Garmendia aktorea eta Sua Enparantza aktore eta abeslaria ekarri zituzten iaz, eta Ekain Ibarguren pailazo eta malabarista izango dute aurtengo lehenengo protagonista. Antolatzaileek zehaztu dute solasaldi formatoa izango duela saioak; ez dela pailazo ikuskizuna izango, alegia. Ainara Argoitia BARREN-eko kazetariak elkarrizketatuko du Ibarguren, udaletxeko pleno aretoan. 18:30ean hasiko da saioa, eta haurrek eta gaztetxoek lehentasuna izango dute.
