Iaz baino elgoibartar gutxiagok eman dute izena Behobia-Donostia lasterketarako

Barren 2025eko azaroaren 6a
Deskargatu Info Ahotsak :
Español English Français Català Galego

Hainbat elgoibartar Behobian, iazko Behobia-Donostia lasterketa hasi aurrekoan.

Euskal Herrian jokatzen den herri lasterketa jendetsuena jokatuko dute domekan: Behobia-Donostia. 27.981 korrikalarik eman dute izena aurtengo ekitaldian parte hartzeko, eta mendaroarrak eta elgoibartarrak ere badaude horien artean.

Zehazki, 49 elgoibartar (42 gizon eta 7 emakume) eta 6 mendaroar (5 gizon eta emakume 1) daude izena emanda. Azken bi edizioetan Elgoibarko 60tik gora lagunek eman zuten izena proba entsutetsu honetan parte hartzeko, baina jaitsiera egon da kopuru horretan.

Iaztik 28.000 pertsonakoa da lasterketako parte hartzaile muga —2015ean, 34.000 lagunek hartu zuten parte, partaidetza errekorra ezarriz—, eta aurten ere eskuragarri jarri dituzten dortsal ia guztiek jabea dute: 27.981 lagunek eman dute izena. Inoiz baino emakumezko gehiago ariko dira Behobia-Donostia herri lasterketaren 60. ekitaldian, 9.474 guztira, hau da, partaideen %33,86 izango dira emakumeak.

Emakumeen parte hartzea sustatzeko 50/50/25 egitasmoa jarri zuen abian Fortuna Kirol Elkarteak 2018an, eta bukatutzat eman dute aurten. 2025erako parte hartzaileen %50 emakumezkoak izatea helburu zuen egitasmo horrek. Antolatzaileek aitortu dute ez dutela helburua bete, baina pozik agertu dira, emakumezko parte hartzaileen kopurua urtez urte igotzen joan delako, eta aurten inoiz baino gehiago izango direlako. Era berean, nabarmendu dute egitasmoaren helburuaren alde lan egiten jarraitzeko asmoa dutela.

Beste datu batzuk ere eman dituzte antolatzaileek. Gipuzkoa da parte hartzaileen jatorrizko herrialde nagusia (7.052 gipuzkoar; partaideen %25,2); eta, 26 eta 30 urte artekoa da parte hartzaileen adin tarte nagusia. Horrez gain, 2014az geroztik gertatzen den moduan, 20,196 kilometroko luzera izango du Behobiatik Donostiako Bulebarrerainoko ibilbideak; eta, 09:30ean abiatuko dira lehenengo parte hartzaileak, esku bizikletaz aterako direnak (65 lagun).

Debabarrena eskualdetik parte hartuko duten saltakarien kopuruak:

  • EIBAR 113 antxitxikari (40 emakume 73 gizon)
  • ELGOIBAR 49  antxitxikari (7 emakume  42 gizon)
  • DEBA 36 antxitxikari (9 emakume 27 gizon)
  • MUTRIKU 20 antxitxikari (5 emakume 15 gizon)
  • MENDARO 6 antxitxikari (1 emakume 5 gizon)
  • ITZIAR 4 antxitxikari (0 emakume 4 gizon)
  • SORALUZE 4 antxitxikari (1 emakume 3 gizon)

 

Kirola Elgoibar