Elgoibar

Elgoibarko eta Mendaroko antxitxikarien emaitzak 58. Behobia-Donostia lasterketan

Barren.eus 2023ko aza. 12a, 20:29

Elgoibarko eta Mendaroko 60 saltakarik lortu dte Behobia-Donostia lasterketa amaitzea, iaz baino dozena bat gehiagok.

Aurten 29.639 lagun zeuden izen emanda lasterketa entzutetsuan parte hartzeko eta 25.889 agertu dira azkenean Behobiako irteera gunera. 253 lagun erretiratu egin direnez, 25.636 antxitxikarik lortu dute Donostiako Boulebardeko helmuga marra gurutzatzea, horien artean 53 elgoibartarrek eta 7 mendaroarrek (65 elgoibartar eta 8 mendaroar zeuden izena emanda).

Iaz, moduan, Igor Torres Castilla izan da gure ordezkarien artean azkarrena 01:11:27ko denborarekin. Iaz baino 10 segundo gehiago behar izan ditu aurtengoan. 2019an lortu zuen bere marka pertsonala: 1:10:05. Denbora hori ontzea, baina, zaila izango dela uste du, adinean gora doalako. Alabaina, lehen eguneko ilusioarekin jarraitzen duela aitortu du, eta pozik etxeratu dela, zuen guztia emanda. Emakumezkoetan Pilar Arriola saltakari nekaezinak lortu du denborarik onena: 01:43:37. Aurtengoan sekula baino emakume gehiagok hartu du parte, 7.482 emakumek, hain justu ere, edo beste era batera esanda: parte hartzaileen %29 izan dira emakumeak. Elgoibartik eta Mendarotik joandakoen artean baxuagoa izan da emakumeen batazbestekoa, %11,6 izan dira emakumeak, zazpi orotara.

Igor Elizburu Astigarragak hand-bike modalitatean hartu zuen parte eta 56:51ko denboran osatu zuen ibilbidea, ordubetetik behera egiteko bere buruari jarri zion erronka betez. Proba honetan duen marka pertsonala 3 minutuan ondu du Elizburuk.
• Errekor berria ezarr du Lachgarrek
Gaurkoan Chakib Lachgar eta Laura Rodriguez izan dira azkarrenak Behobia eta Donostia arteko 20 kilometroak osatzen. Gizonezkoetan bigarrengoz eskuratu du garaipena Lachgarrrek, baina oraingoa probako errekorra ondu du, 59 minutu eta 56 segundoko denbora eginda. Gainera, bera da aurrenekoa ordubeteko langatik jaisten, orain arte inork ez baitzuen lasterketa ordubete baino gutxiagoan osatu. Emakumezkoetan Laura Rodriguez kantabriarra gailendu da 1:14:22ko denborza eginda. Lau segundo eskaseko aldea atera dio helmugan Sara Villasante donostiarrari.

Elgoibartarren sailkapena 58. Behobia-Donostian (postua, izen-abizenak eta denbora)