Zaporeak Gobernuz Kanpoko Erakundeak bultzatu du Zaporeak erronkaren zazpigarren ekitaldia eta Lesboseko errefuxiatu kanpalekuetara bidaltzeko janari bilketa egin zuten aurreko astean, Debabarrenako herrietan. Elgoibarren garbantzu pedrosillanoak batzen aritu ziren eta 972 kilo batu zituzten, iazko kopurua bikoiztuz ia (575 kilo jaso zituzten 2024an). Herritarrek hainbat lekutan eman zitzaketen garbantzuak: Merkatu plazan, Santa Anako Eroskin, Txilarre eko-dendan eta Marrubi dendan. Horiez gain, ikastetxeetan ere jaso dituzte garbantzuak. Mendaron hodi erako makarroiak batu zituzten Lagun Betikoak tabernan, Rotetan, Sonianean eta Coviran janari dendan. Oraingoz ez daukagu Mendaron jasotako kopuruaren daturik.
12.000 kilo eta 12.000 euro
Iaz 25.000 kilo elikagai batu ostean, erronkaren sustatzaileek 50.000 kilo batzeko erronka jarri zuten aurtengo ediziorako, baina ez dute kopuru horretara iristerik lortu. 12.000 kilo inguru batu dituztela jakinarazi zuten Urkotronik vending enpresaren egoitzan egin zuten agerraldian, han batu baitituzte jasotako elikagaiak, gero Greziara bidaltzeko. Jarritako kopuruetara heldu ez arren, balantze positiboa egin dute. "Anbizio handiko erronka jarri genion gure buruari, baina pozik gaude lortutakoarekin. 12 tona janari batzeaz gainera, 12.000 euro jaso ditugu rifen salmentari eta Tuper Solidarioa moduko ekimenei esker. Zozketa bereziki arrakastatsua izan da, 6.000 txartel saldu baitira, 2024an baino 1.000 euro gehiago. Gainera, 25.000 euroraino iritsiko garela uste dugu hurrengo egunetan jasotzea espero dugun donazioei esker", azaldu dute. Kalkulatzen dutenez, Debabarrenean jasotako elikagaiekin eta diruarekin hilabetez eman ahalko diete jaten Lesboseko errefuxiatu kanpalekuetan dauden errefuxiatuei.
Iaz baino elikagai gutxiago jaso izanaren inguruko arrazoiak edo dituzten usteak ere plazaratu zituzten agerraldian. Inflazioak eta hainbat produktuk izan duten prezio igoera bortitzak eragin handia eduki duela uste dute.
Zaporeak erakundeak eskerrak eman dizkie ekimenarekin bat egin eta laguntza eman duten herritar, erakunde eta enpresa guztiei eta, bereziki, ekimena aurrera ateratzen lagundu duten 150 boluntarioei. Gainera, jende berria gerturatu dela sumatu dute eta ekimenak etorkizuna izan dezan garrantzitsua dela azpimarratu dute. Babesle izan dituzten Urkotronic, Cartonajes Eibar, Igartza, Lumagorri, Bacalaos Alcorta, Eroski, eskualdeko jatetxe eta sukaldariak eta eutren artelanak eman zizkien eskualdeko artistak ere gogoan izan dituzte eskerrak ematerakoan.
