Elgoibar

Antxitxikari elgoibartarren emaitzak 2024ko Mugertza krosean

Barren.eus 2024ko urt. 8a, 20:56

Mintxeta Atletismo Taldeko hamasei kidek hartu zuten parte Mugertza Krosaren 80.ekitaldian, eta horiez gainera beste talde batzuetan lehiatzen diren bi elgoibartarrek ere hartu zuten parte nazioarteko lasterketan.

Elgoibartarrez eta soraluzarrez osatutako hamasei laguneko taldea aurkeztu zuen Mintxeta Atletismo Taldeak Mugertza krosera, iaz baino kopuru txikixeagoa. Horietako bi gizonezkoen lasterketa nagusian lehiatu ziren, Mikel Gurrutxaga eta Igor Torres. Gurrutxagak 66. postuan bukatu zuen proba, eta ohikoa den moduan lehen sailkatuek atzetik ez harrapatu izana ospatu zuen azkenaurreko itzulian helmuga marratik pasa zenean, ikusleen txalo artean. Igor Torresek lortu izan du beste urte batzuetan balentria bera, baina afrikarrek atzetik harrapatu eta proba bertan behera lagatzera behartu zuten, kroseko araua betez. Era berean, Durangoko Bidezabal taldearen elastikoarekin saltaka egin zuen Asier Arenalek ere ezin izan zuen proba bukatu, lehen sailkatuek atzetik harrapatu zutelako. Super Amara Bat taldea ordezkatuz antxitxika egin zuen Mikel Agirrebeñak lasaitasun gehiagorekin amaitu ahal izan zuen proba, eta 41. postuan sailkatu zen, 36:38ko denbora eginda. Hala, iaz lortutako postua eta denbora ondu zituen (46. postuan sailkatu zen, 39:55eko denbora eginda. Guztira 84 lagunek lortu zuten senior gizonezkoen proba amaitzea, eta 26k laga behar izan zuten lehen sailkatuek atzetik harrapatu zituztelako.