Aingeru Guardakoaren egunean, meza ospatuko dute, esan bezala, Plaza auzoko ermitan, eta txosna ere jarriko dute jai-batzordekoek. Ohi legez, baina, domekan egingo dute jai handia.
Domekan, eguna hasteko, 11:30ean Hitzaren liturgia izango dute, eta elizkizunak amaituta, 12:00etan hasiko dute festa ermita kanpoan. Maider Arregi eta Aitor Urbieta bertsolariak gonbidatu dituzte kanturako eta herriko trikitilari gazteek jarriko dute musika: Elene Goikoetxea, Jare Agea eta Garazi Ulazia soinu-joleek eta Aitana Archeli eta Irantzu Agirregabiria pandero-joleek.
Ondorenerako, herri-kirol saioa lotu dute. Julen Cañamares eta Aratz Mugertza aizkolariak jarriko dituzte lanean, eta aizkora-jokoan eta saltaka arituko dira biak, nor baino nor. Antolatzaileek txosna jarriko dute jan-edanerako.
Aingeru Guardako ermitaren ondoan egin ohi duten jaia autopista azpira aldatu behar izan zuten lekuz iaz, derrigorrean, eguraldiagatik