Ordu berean jokatuko dituzte bi herrietako lasterketak abenduaren 31n, 17:00etan.
Mendaroko Txirrindulari Elkarteak antolatzen du Mendaroko San Silbestrea. Goñati pilotaleku parean izango da irteera, eta 5,2 kilometroko distantzia osatu beharko dute korrikalariek. 12 urtez gorakoek parte hartu ahal izango dute, baina 12-14 urte bitartekoek heldu batek lagunduta egin beharko dute korrika. Parte hartzeko izena eman beharko da, frontoian bertan. Proba hasi baino orduerdi aurretik zabalduko dute horretarako tartea. Bukaeran mokadua ere banatuko dute antolatzaileek, Mendaroko Udalaren laguntzarekin.
Nuala elkartekoek gidatuko dute neutralizatutako itzulia
Elgoibarkoa CATT Morkaiko taldeak antolatzen duen bigarengoa izango da, iazko estreinaldia eta gero. Parte hartzaileek 5 kilometroko ibilbidea osatu beharko dute Elgoibarko kaleetan barrena. Hasteko neutralizatutako itzuli txiki bat emango dute: Kalegoen plazatik hasi, San Bartolome kalean gora Kalebarreneraino eta berriro plazara itzultzeko, Errosario kalean behera. Nuala elkarteko kideek gidatuko dute lasterkarien tropela lehen itzuli horretan. Jarraian hiru itzuli handi eman beharko dizkiote iazko ibilbide berdinari.
Sariak eta opariak
Antolatzaileek zehaztu dutenez, ez da kronometrajerik edo sailkapenik egongo. Hala ere, gizonezko eta emakumezko azkarrenek, podiuma osatuko dutenek, garaikurrak jasoko dituzte. Probaren amaieran 'Korrikalariaren poltsa' ere banatuko dute, hainbat produkturekin eta oroigarrizko jantzi batekin osatua. Nualako kideek eskutik jasoko dute poltsa partaideek. Era berean, parte hartzaileen artean opariak ere zozkatuko dituzte, Txankakuaren eta herriko ostalarien laguntzari esker. Hona sari emaleak eta banatuko dituzten sariak:
- Txankakua: 50 euroko bi erosketa-bonoa
- Txarriduna: Bi pertsonentzako afaria.
- Mintxeta taberna: Bi pertsonentzako afaria.
- Astigarraga: 50 euroko erosketa-bonoa.
- Lizagasar: Euren produktuen saskia.
- CATT Morkaiko: Taldeko kamiseta eta galtzerdiak.
- Idal Kirol Patronatua: Urteko abonua kiroldegirako.
Izenemateak lasterketa egunean egin beharko dira, 15:30etik 16:45era bitartean, bost euro ordainduta. Antolatzaileek 200 lagunetan jarri dute parte-hartzaileen muga. Lasterketan parte hartzeko gutxieneko adina 12 urtekoa den arren, 15 urtetik beherako gazteak heldu batekin parte hartu behar dute parte.
Iazko San Silbestre lasterketa Elgoibarren: