San Bartolomeetako 24. Harri-Jasotze Txapelketa jokatu dute Kalegoen plazan, baina ezin izan dutebukatu ekaitza bota baitu 25 bat minutu zeramatzatenean. Eguraldi iragarpenak ekaitzak ematen zituen eta hori dela eta tamaina txikiko bi karpapean aritu dira harrijasotzaileak. Beste urte batzuetan baino harrijasotzaile gutxiagok eman dute izena gaurko, lauk, hain justu ere, baina maila handikoak, horien artean iazko txapelduna, Mikel Lopetegi Urra (Zarautz, 1997). Iaz zazpi harrijasotzaile aritu ziren Belaustegi eta Mintxeta harriekin lehian.
Ohi moduan Mintxeta (124,8 kilo) eta Belaustegi (145,8 kilo) harri irregularrak altxa behar zituzten harrijasotzaileek, bost minutuko tanda banatan. Belaustegi harriarekin hasi da lanean laukotea, Iraitz Arruti lehenik, Urra gero, Azpiazu hirugarren eta Hodei Iruretagoiena laugarren. Lehen tximista eta trumoiak Arruti lanean hasi denean bota ditu, baina ondo antzean eutsi dio eguraldiak Urrak eta Azpiazuk euren txandak bukatu bitartean. Hodei Iruretagoiena Izeta IV.a plazaratu denean, baina, benetan beltz jarri da zerua eta gogotik hasi du euria, haize bolarekin lagunduta. Harria altxatzen jarraitu du Iruretagoienak, baina dena busti du euriak eta ezin izan dute Mintxeta harriarekin jarraitu. Udaltxeko arkupeetan hartu dute babesa harrijasotzaileek, ikusleek eta antolatzaileek eta proba amaitutzat ematea erabaki dute Kalamua Elkartekoek. Belaustegi harriarekin eginiko altxaldi kopurua hartu dute aintzat sailkapena osatzeko (sailkapena beherago duzue).
Gizonezkoen lehia hasi aurretik, erakustaldia eman dute hiru harrijasotzaile emakumezkok: Udane Ostolaza, Maddi Gesalaga eta Goizeder Abendibarrek. Ez zegoen euren parte hartzea iragarrita, baina Mintxeta Memorialean harrijasotzaile gutxik izena eman zutela-eta, herri-jirol saioa emakumezkoen parte hartzearekin osatzea erabaki zuten antolatzaileek.
Sailkapena (Mintxeta Memoriala XXIV. Harri-jasotze Txapelketa)
- Mikel Lopetegi Urra: 13 altxaldi Belaustegi harriari
- Paulo Azpiazu: 9 altxaldi
- Hodei Iruretagoiena Izeta IV.a: 7 altxaldi
- Iraitz Arruti: 7 altxaldi
Harrijasotze txapelketako argazkiak Baserritarren Eguneko bilduman