Iragarrita zegoen eta bete-betean asmatu dute. Euriak eta bereziki haizete handiek kalteak eragin dituzte bazterretan, eta agerikoak dira, besteak beste, errepidean, arbola adar ugari ikusi daitezkeelako errepide ertzetan. Arratsaldeko 18:00ak aldera Herrizaingo Sailetik jakinarazi dute Elgoibarren, 634 errepidean arbola bat jausi dela 55. kilometro inguruan, eta arratsaldeko lehen orduan A8 autobidera erori den beste arbola batek erreil bat itxiarazi duela, Irungo norantzan. Azal orrira ekarri dugun irudia, baina, Mendarokoa da. Arratsaldeko lehen orduan arbola adar handi bat bota du haizeak Azpilgoetara bidean, Intxaurbakoitzako aldapan, eta larrialdi zerbitzuetakoak lanean jardun dira ingurua garbitzen eta 20:00ak aldera zabaldu dute Azpilgoeta auzora sartzeko errepide zati hori, baina Udaletik jakinarazi dute oraindik garbiketa lan batzuk falta direla egiteko eta bihar bukatuko dituztela.
