Kalez kale ibili ziren goizean txistulari eta danbolinteroak, Mendaroko auzoetan barrena, eta goiz erdian tailerra egin zuten Azpilgoetako Kultur Etxean, elkarrengandik ikasteko. Ordubete pasako tailerra izan zen, eta ondoren, Herriko Enparantzan saio labur bat egin ostean, Kilimon elkartera jo zuten, bazkaltzera. Arratsaldean, plazako dantzak jo zituzten Herriko Enparantzan eta Mendaroko Gazteak dantza taldeko dantzari batzuk ere inguratu zitzaizkien dantzara. Plazako saioaren ondoren, tabernaz tabernako bidea hasi zuten.