Mendaro Txirrindulari Taldeko zikloturista da 62 urteko mendaroarra, eta Lekeitiora joan-etorria egiten ari zen barikuan. Milloi mendate gainera iristeko kilometro bat eta erdi falta zitzaionean, baina, Lekeitiotik mendatean behera zetorren kamioi batekin topo egin zuen. Egurra garraiatzen zuen kamioiak zeraman karga galdu zuen albo batetik bihurgune batean, eta hainbat enbor errepidera erori ziren.
Diazek zuhaitz enborrak zuzen-zuzenean beragana zihoazela ikusi zuen, eta bizirik irteteko esperantzarik ez zuela aitortu du. "Nireak egin zuela pentsatu nuen. Ni nengoen lekutik 25 bat metrora erori ziren enborrak errepidera eta maldan behera pirritan zetozen nigana. Oinak askatu eta bizikletatik salto egiteko astia eman zidan, eta gutxigatik ez ninduten azpian harrapatu, nire bizikletari gertatu zitzaion moduan. Enborren gainean bukatu nuen nik, haien artean igeri egiten ariko banintz moduan besoak mugituz. Bazter-babesa eta enborren artean zanpatuta gelditzeko ere gutxi falta izan zitzaidan", azaldu dio BARRENi.
Azpian hartu ez arren, belaun buruak odoletan laga zizkioten enborrek. "Unearen bapatekotasunarekin, minik ere ez nuen nabaritu, baina hurrengo egunean gorputz osoko minarekin esnatu nintzen, eta ubelduraz beteta". Anbulantzian artatu zuten arren, ez zuen ospitalaratzerik behar izan. Min gehiagorik hartu ez izana mirari bat izan zela uste du, eta egurra garraitzen zuen kamioilaria ere uste berekoa zela dio, "hark ere nireak egin zuela uste zuen, eta halaxe errepikatu zidan behin eta berriro".
Hona istripua Ignacio Diazek lagatako argazkietan
