Langabeziak beheranzko joera hartu du irailean Elgoibarren, eta eskualdean

 Lanbidek emandako datuen arabera, abuztutik irailera bitartean 0,43 puntu jaitsi da langabezia tasa Debabarrena eskualdean. Guztira 3.390 langabe daude Debabarrenan, aurreko hilabetean baino 113 gutxiago. Elgoibarren 620 langabe daude (630 abuztuan) eta 101 Mendaron (102 abuztuan). Elgoibarko langabezia tasa %11,21ekoa da eta Mendarokoa %10,21ekoa.

Elgoibar zein Mendaroko langabezia tasa Gipuzkoakoaren (%11,2) parean dago, eta Arabako, Bizkaiko eta Gipuzkoako batez bestekoaren (%13,5) azpitik. Debabarreneko batez bestekoa, berriz, %12,81 da.

Lanbide Euskal Enplegu Zerbitzuak 144.758 langabe erregistratu ditu irailean bere bulegoetan. Irailean 1.692 langabe gutxiago daude, hau da, % 1,16 gutxiago. Hilabete honetako langabeziaren bilakaera "krisirik gabeko urteetako epe bereko bilakaeraren antzekoa" dela nabarmendu dute Lanbideko arduradunek. Ildo beretik, zehaztu dute 2020ko otsailean baino 29.211 langabe gehiago zenbatu dituztela, hau da, Covid19aren pandemia hasi zen unean. Datuoi erreparatuta, pandemiak lan merkatuan udaberrian izan zuen inpaktua urteko azken zatian zuzentzea espero dute.