Azaroaren 15ean eta 16an Dubain jokatuko duten munduko txapelketa prestatzen ari da elgoibartarra azken hilabeteetan, eta prestaketa horren barruan hartu zuen parte Italian jokatutako txapelketan. "2022tik lehiatu gabe nago, eta munduko txapelketaren aurretik pase bat egin nahi nuen; profesionalen txartela aktibatzeko ere balioko dit", esan zion BARRENi joan zen astean.
Peruggian bi lehiakide bakarrik aurkeztu ziren bere kategorian: bera eta italiar bat, eta etxekoak irabazi zuen. "Ezusteko handia hartu nuen bi lehiakide bakarrik izango ginela jakitean, 8-9 bat izango ginela uste bainuen. Italiar baten aurka, eta bere etxean... garaipena garesti zegoela ulertu nuen", adierazi du Rodriguezek. Kirol hau "oso subjektiboa" dela gaineratu du, eta oraingoan galtzea tokatu zaiola. Halere, dioenez, bere benetako helburua lortzeko beroketa ariketa bat besterik ez da izan: "munduko txapelduna izatea".
Iosu Rodriguezek bere sareetara igo du eszenatoki gainean egin zuen saioa.
