Hazilan+ izena du programak eta Debabarreneko udalek eta Debegesak sustatu dute elkarlanean. Pertsona kualifikatuak laneratzeko laguntza-programa da; eta, helburu hori lortzeko, programak hainbat orientazio-ekintza jarriko ditu parte-hartzaileen eskura: zeharkako gaitasunetan trebatzea, ezagutzen eguneraketa, enpresako praktikak, etab.
Egitasmoa, aldez aurretik esperientziarik ez duten gazteei eta egoera desberdinengatik langabezian dauden pertsona helduei zuzenduta dago. Hazilan+ek lehentasuna emango dio etxeko eta zaintza-lanetan aritu izan diren emakumeen lan-merkaturatzera, "datuek erakusten dutelako emakume horiek direla zailtasun handienak dituztenak". Parte hartu nahi dutenek langabezian egon behar dute, eta erdi-mailako, goi-mailako edo unibertsitateko titulua izan behar dute.
Programak, halaber, parte-hartzaileen gaitasunak euskal enpresen beharrekin gurutzatu nahi ditu, "bi aldeen interesei erantzuteko eta gizarte- eta enpresa-sare indartu, dinamiko eta lehiakorra sustatzeko". Alde horretatik, lurraldeko garapen-agentziak funtsezko eragileak izango dira proiektuaren garapenean, 8.000 enpresa-sarea baitute.
Bi ibilbide
Hazilan+ programan parte hartzen duten pertsonek beren beharren arabera bi ibilbide garatzeko aukera izango dute: Osatu edo Lorpen.
- Osatu ibilbidearen bidez, parte-hartzaileek lan-merkatuan eskatzen diren gaitasun pertsonalak eta profesionalak lortu ahal izango dituzte talde tailerren bidez. Prestakuntza fase hori maiatzean hasi eta ekainean amaituko da. Ibilbide hori enpresa-praktikekin osatzen da, parte-hartzaileek benetako lan-esperientzia izan dezaten.
- Lorpen, bestalde, banakako ibilbide bat da, enplegu bat lortzeko beharrezko trebetasunak lortuta dituzten pertsonak edo Euskaditik kanpo dauden eta itzultzeko asmoa duten pertsonak zuzenean laneratzera bideratua. Ibilbide honetan parte hartzeko izen-ematea zabalik dago.
Hiru dira parte hartzaileek bete behar dituzten baldintza nagusiak: langabezian egotea, erdi-mailako, goi-mailako edo unibertsitateko titulua edukitzea eta Debabarrena eskualdeko herriren batean erroldatua egotea.
Debegesa izango da programaren kudeatzailea eta hortaz, ibilbideen informazioa eta izena emateko formularioa bere webgunean daude eskuragarri: www.debegesa.eus
16 garapen-agentzia parte-hartzaile
Hazilan+ proiektua Arabako, Bizkaiko eta Gipuzkoako hamasei agentzien eta beste hainbat erakunderen arteko lankidetza-proiektua da: Amurrio Bidean; Erandioko Udala – Behargintza; Iraurgi Lantzen (Iraurgi Berritzen); Leioako Udala – Behargintza; Goierriko Ekimena (Goieki); Laudioko Udalaren Garapen Agentzia; Beterri-Buruntza Mankomunitatea; Urola Garaiko Garapenerako Agentzia (UGgasa); Debabarrena garapenerako elkartea – Debabarreneko garapen ekonomikorako elkartea (Debegesa); Debagoieneko Mankomunitatea; Tolosaldea Garatzen; Behargintza Txorierri (Egaz Txorierri); Mungialdeko Behargintza; Urola Kosta Udal Elkartea eta Lanbide Ekimenak.
Gure eskualdearen kasuan, proiektu hau EGF 2021-2027 Programak kofinantziatzen du % 40an eta Debabarreneko eskualdeko Udalen finantziazioa jasotzen du % 60an.
Hazilan+ proiektuan 1.400 pertsonak hartuko dute parte. Hazilan+, Hazilan proiektuaren jarraipena da. 2016tik 2024ra bitartean gauzatu zen eta 2.100 parte-hartzaile baino gehiago izan zituen.