Jaitsiera postuetatik irten nahi duten bi talderen arteko neurketa jokatu zuten gizonezkoen Haundi taldeak eta Aloña Mendik, domeka arratsaldean, Oñatin. Jokalariei babesa emateko Oñatira joateko autobusa ere antolatu zuen C.D. Elgoibar klubak. Bederatzi partida zeramatzan Haundik partidarik irabazi gabe eta hamargarrengoan iritsi zen horren beharrezkoa duten garaipena, Aloña-Mendiri 0-2 irabazita. Julen Guillo (59. minutuan) eta Gorka Guridi (61') izan ziren goleatzaileak.
Gainera, garaipen honekin elgoibartarrek aurrea hartu diete oñatiarrei sailkapenean. Azken hiru sailkatuek galduko dute maila, eta azken hirugarren postuan dago orain Haundi, 26 punturekin. 24 puntu ditu Aloña Mendik eta 19 puntu Vasconiak. Gorantz begira jarrita, Haundik baino hiru puntu gehiago dituzte Hernanik (29 puntu) eta Beti Gaztek (29 puntu). Hain justu ere, Haundik Beti Gazteren aurka jokatuko du hurrengo jardunaldiko partida, Mintxetan. Zazpi partida falta dira liga amaierarako, eta horietako lau Mintxetan jokatuko dituzte elgoibartarrek.
12 jardunaldi eta gero, garaipena
Emakumezkoen Haundi taldeak ere garaipen garrantzitsua lortu zuen domekan Mintxetan, Irauli Bostekori 3-2 irabazita. Hamabi jardunaldi zeramatzaten partidarik irabazi gabe, abenduaren 14an Beti Gazteri irabaziz geroztik. Orain azken hirugarren postuan daude 20 punturekin. Beti Gazte da azkenaurrekoa, 20 punturekin eta Ondarbeltz Amaikak Mutriku taldea dago azken postuan, mailari eusteko aukerarik gabne, 4 punturekin. Elgoibartarrek puntu batera dute jaitsiera postuetatik kanpo dagoen lehen taldea, Irauli Bosteko eta eurek baino bi puntu gehiago dituz Hernanik. Azken bost jardunaldiak finalak modukoak izango dira eta Bergaran jokatuko dute aurrenekoa, asteburuan. Hurengo jardunaldietan mailari eusteko borrokan dabiltzan Beti Gazte eta Hernani izango dituzte aurkari.