Bruna liburua aurkezteko ekitaldia egin dute gaur goizean proiektuaren sustatzaileek Aita Agirre Kulturgunean.
Jasone Osoro idazleak azaldu duenez, bere jatorrizko etxera itzuli da Bruna, paperera, liburu formatora, eta honen bitartez irakurleen etxeetan egongo da, "irakurleen etxeetan biziko da eta irakurle bakoitzak nahi duen denbora guztia eskaini ahal izango dio, patxadaz". Eguberrietan erakusleihoen momentua izan zela esan du, proiektu polita eta berritzailea bere berbetan, Brunak hegan egin baitzuen eta libre izan zen erakusleihoz erakusleiho ibilita. "Nik dudan sentsazioa, baina, irudiaren momentua izan zela da, eskaparateak azken finean irudiarekin lotuta daudelako. Une bateko kontua da, aldakorra. Brunarentzat garrantzitsua izan zen, Judit Piella ilustratzaileak eta Mario eta bere lantaldeak lan oso dotorea egin baitzuten, baina nire irudipena da jendeak irudikatu egin zuela istorioa, eta orain sentitzen dudana da Bruna etxera itzuli dela, bere jatorrizko etxera, paperera", adierazi du istorioen sortzaileak.
Brunaren inguruko proiektua herriko hainbat eragilek elkarlanean ondutakoa dela gogora ekarri du Elgoibarko alkate Maialen Gurrutxagak liburuaren aurkezpenean, eta nabarmendu du ez dela umeek irakurri ahal izango duten ipuin bat gehiago, "gure herriko ipuina" baizik. Balore asko ukitu eta lantzen dituen istorioa dela azpimarratu du Gurrutxagak.
Hitzen eta pentsamenduen indarra
Hitzek eta pentsamenduek daukaten indarra islatu nahi izan duela liburuan esan du Osorok, eta gogora ekarri ditu istorioaren nondik-norakoak, honela: "Bere ilea oso zatarra dela esaten dio mutil batek Brunari, ardien ilea modukoa duela, eta tuntuna dela; eta, jendeak barre egiten dio. Brunak sinistu egiten ditu hitz horiek eta erabat aldatzen da bere buruarekiko eta bizitzarekiko daukan ikuspegia. Hasten da bere buruari hitz zatarrak esaten, hasten da bizitza eta mundua kolorerik gabe ikusten, bere buruarengan zuen konfiantza galdu du, zuen alaitasunarekin batera, eta lagunekin kalean jolasten egon beharrean berak nahi duena da etxean geratu, ezkutatu eta desagertu. Bidai honetan konpainiak eragin handia dauka, inguruan zer jende daukagun, nola hitz egiten digun eta zer esaten digun galdutako indar hori berreskuratzeko".
400 ale
Olatz Oñederra ilustratzaile elgoibartarrak maketatu du liburua eta 400 ale argitaratu dituzte. Herriko ikastetxeetan banatuko dituzte batzuek, gelaz gela. Salmentan ere jarriko dute, Pitxintxun, 15 euroan. Brunaren panpina ere Pitxintxun egongo da zenbait egunetan.