Quico Cadaval (Ribeira, Galizia, 1960) izango da ipuin kontalaria, eta gaztelaniaz egingo du saioa. 19:00etan izango da, Aita Agirre kulturgunean. Antolatzaileek aurrez izena emateko eskatu dute 943 743 525 edo 688 710 138 telefonoetan edo liburutegia@elgoibar.eus helbidera idatzita.
Cadaval aktore, idazle eta narratzaile galiziarra da, eta interpretazio tailerrak ere ematen ditu. Liburutegik azaldu dutenez, Ahoz Aho´25, Ahozkotasunaren nazioarteko jaialdiaren barruan etorriko da Cadaval Elgoibarrera. Iaz, esaterako, Carolina Rueda ipuin kontalari kolonbiarrak eman zuen saioa Elgoibarren. "Guretzako ohore bat da Cadaval moduko punta-puntako kontalari bat gurera etortzea", azpimarratu dute liburutegiko arduradunek.
30 artista, 18 herritan
Ahoz Aho Ahozkotasunaren Nazioarteko Jaialdia La Caratula antzerki taldeak antolatzen duen FIO –Festival Internacional de la Oralidad– jaialdiaren adar bat moduan jaio zen, orain dela hamazortzi urte. Euskal Herriko Intujai Teatro taldeak bultzatzen du Ahoz Aho jaialdia. Euskal Herriko zein atzerriko punta-puntako ipuin kontalariak elkartuko ditu aurtengo jaialdiak. Jaialdiaren zutabe nagusiak Tolosa eta Ordizia izango badira ere, guztira 18 herritan izango dira ekitaldiak aurten, tartean Elgoibarren, eta 30 artista inguruk parte hartuko dute. Horietatik hamar Euskal Herritik kanpoko herrialde eta kulturetakoak dira. Horietako batzuk dira Quico Cavabal (Galiza), Celeste Abba (Argentina), Patricia McGill (Urugai), Carles Garcia Domingo (Errioxa), Nico Lubo (Kolonbia), Eva Andujar (Valentzia), Zoa Tamara Cuellar (Nikaragua), Tarana Karim (Azerbaian) eta Cardelina (Gaztela Leon).
Jaialdiaren koordinatzailea den May Gorostiagaren berbetan, ekitaldi txiki bat izaten hasi zena, pixkanaka gorpuzten eta hazten joan da, eta hemezortzi urteren ondoren, “jaialdi potente bat” bihurtu da, eta Euskal Herrian ez ezik, estatuan eta Europa mailan erreferente izatea lortu du. (informazio osoagoa hemen)