Inazio Bereziartua musika eta dantza eskolako ikasleak eta irakasleak duela lau urte hasi ziren Inauterietako Eguen Zuri eguna girotzen eta aurtengorako Mexikoko folklorean eta iruditerian oinarritutako jaia antolatu dute. Mexikoko musikaz girotu dituzte kaleak eta hango dantzak dantzatu.
Musika eskolako txarangak gidatu duen kalejirarekin hasi da ekitaldia, Kalegoen plazan. Rantxera eta mariatxi doinuak jo eta dantzatu dituzte plazan eta Kalebarrenen egin dute gero geldialdia, tronpeta taldekoen saioa entzuteko. Maalara arte jarraitu du kalejirak eta han koruen txanda izan da. Gaztenaia korukoek De Colores abestia interpretatu dute lehernik, et Korunahiako kideen laguntzaz Coco filmako hainbat abestirekin eginiko nahasketa kantatu dute gero guztiek elkarrekin. Gero, hainbat pieza jo ditu eskolako orkestra txikiak eta txarangakoern kalejirarekin amaitu da Eguen Zuri Egunerako prestatua zuten ospakizuna.
