Hasteko, Eskola Kiroleko Xake Txapelketa jokatuko dute zapatuan (abenduak 14) Zubi Ondo taldekoen egoitzan, Juan Mugertza kalean (pista beltza). Parte hartu nahi dutenek 10:30erako agertu beharko dute hara.
Xake azkarreko txapelketak, taldeka eta banaka
Domekan, berriz, Tomas Conderen oroimenezko Createch Medical xake txapelketak jokatuko dituzte, goizean bata eta arratsaldean bestea, taldekakoa lehena eta banakakoa bigarrena, biak ala biak partida azkarren lehiak izango dira. Taldekakoa jokatuko dute lehenik, 10:00etatik aurrera, Zubi Ondo xake taldearen egoitzan. Hamabi taldek eman dute izena. Toki askotatik etorriko dira taldeak: Abadiño, Barakaldo, Santurtzi, Basauri, Bergara, Azkoitia, e.a. Hona orain arte izena emandako taldeen zerrenda:
- Createch Medical
- Martintxo
- Abadiño
- Barakaldo
- Liendo
- Santurtzi
- Bergara (duda)
- Anaitasuna kakute
- Alfil
- Torre de Llanes
- SPR Basauri
- Berkoa
Banakako lehia, arratsaldean
Domeka arratsaldean azkenik, partida azkarren Createch Medical banakako txapelketa jokatuko dute 15:00etatik aurrera Mugertza kalean duten egoitzan. Suitzar sistemarekin jokatuko dute txapelketa, bederatzi errondara. Hiru minutuko partidak izango dira.
