Magia egitea eta ikustea du gustuko Alain Zulaika Niala magoak. Ahal duen oro joaten da inguruko herrietako magia topaketetara, eta oraingoan bera joan beharrean, magia etxean antolatzea pentsatu du, elgoibartarrei herritik mugitu gabe magiaz gozatzeko aukera emateko.
Udaberrian egitekoa zuen Mirariak magia jaialdia, baina osasun arazoak medio, bertan behera laga behar izan zuen. Oraingoan indarberrituta dator mago elgoibartarra. Mirariak izena jarri dio jaiari, eta ilusioz beteriko asteburua izango dela aurreratu du. Adin guztietako jendearentzako magia saioak prestatu ditu, gertutik ikustekoak, magia distantzia txikian gehiago gozatzen delako.
Zapatu goizean hasiko dira ekitaldiak umeentzako magia tailerrarekin. 6-12 urte bitartekoentzako saioa prestatu du, eta adinka bereiztuko ditu, talde txikitan, trukoak erakusteko. Edukiera mugatua dauka tailerrak, eta izena eman behar da parte hartzeko, kontaktu@niala.es helbidera idatzita. "Saio horietan umeek izugarri gozatzen dute, eta gurasoek ere bai, trukoak ikastea denei gustatzen zaie", esan du Nialak.
Nialaren ikuskizun berria Aita Agirren
Zapatu iluntzean, bestalde, Niala magoaren Hil edo Ez Hil ikuskizun berriaz gozatzeko aukera egongo da Aita Agirren. Helduentzako saioa izango da, eta heriotzaren gaia landuko du. Suizidioa, reenkarnazioa eta betiko tabuak landuko ditu magiaren bidez. "Beti izan da heriotza gai tabua niretzat, baina aldi berean, interesgarria. Magia ikuskizuna heriotzaren gaian oinarritu dut, saio serioa izango da, helduentzako. Magia eta filosofia uztartuko ditut".
Familientzako magia ikuskizuna,domekan
Domeka eguerdian, bestalde, familientzako Magia a Tutiplén izeneko magia ikuskizuna izango da Maalako parkean, Imanol Ituño magoarekin. Umorezko magia saioa izango da, etxeko guztiek gozatzeko modukoa.
Bost mago, magia galan
Domeka iluntzean, 5 mago ikuskizuna egingo dute, Kultur Etxeko sotoan. Gertuko magian oinarritutako saioa izango da, eta 35 bat lagunentzako lekua izango du saio bakoitzak. Bi saio egingo dituzte segidan, 18:30ean eta 20:00etan. "Espero dut nahi duen jende guztiak izatea magiaz gozatzeko aukera asteburuan".
