Herriko kirol taldeek azaroaren 19rako aurkeztu behar dituzte hautagaitzak, Udal Kirol Patronatuta mezua bidalita. Mezuan zehaztu behar dituzte sarituaren izena, abizenak eta saria ematearen arrazoia. Kirol elkarteei laguntze aldera, honako irizpideak aintzat hartzeko eskatu diete antolatzaileek klubei:
- Pertsona bakarra proposatu behar da.
- Aurreko edizioren batean saria jaso duenak ezingo du bigarren aldiz saria jaso.
- Kirolaria, kirolari ohia, entrenatzailea, zuzendaria, laguntzailea, babeslea, edo klubaren ibilbidean zerikusia izan duen edozein pertsona proposatu daiteke saria jasotzeko.
- Emakumeen presentzia bermatu behar da.
Carlos Soriaren solasaldia
Ohitura duten moduan, kirolaren inguruko solasaldi batekin jantziko dute Udal Kirol Patronatuak antolatzen duen sari banaketa ekitaldia, eta Carlos Soria alpinista (Avila, Espainia, 1939) ezaguna izango da aurtengo gonbidatua. 85 urte eduki arren, Himalaiako menditzar handiekin amesten segitzen du, eta hamalau zortzimilakoak osatzeko falta zaizkion bi mendiak igotzeko ahaleginean dihardu. Dhaulagiri eta Shisha Pangma dira zortzimilakoen zerrendan zapaltzeke dituen tontorrak. Hain zuzen, Dhaulagirira igotzeko azken saiakeran lesio larria izan zuen, 7.700 metrotan zegoela eta tibia eta peronea hautsi baitzituen. Erronka osatzeko gogo eta ilusioarekin seitzen duen arren, lesiotik osatzen eman ditu azken hilabeteak.
Mendizalea betidanik izan den arren, 60 urtetik aurrera hasi zen zortzimilakoei erreparatzen. Igoak dituen hamabi zortzimilakoetatik hamar adin horretatik aurrera igo ditu. 62 urterekin igo zuen Everest (8.848 metro), 65ekin K2 (8.610 metro), 75ekin Kanchenjunga (8.586 metro) eta, 77 urterekin, Annapurna (8.091 metro). Baina Makaluko (Nepal, Himalaia, 8.463 metro) igoera du bereziki gogoan, 69 urterekin lortzeaz gainera oxigenorik gabe eta lehen saiakeran lortu zuelako tontorra egitea. K2 (65urte), Broad Peak (68 urte), Makalu (69 urte), Gasherbrum I (70 urte), Manaslu (71 urte), Kanchenjunga (75 urte) eta Annapurna (77 urte) mendiak igo dituen alpinistarik zaharrena da.
∞Lotura duten albisteak: