Estibaliz Lizasok itzuli du lana euskaratik katalanera, eta Bartzelonako Pol·en edicions argitaletxeak plazaratu du, 'Revers. Testimonis de dones bertsolaris' izenburupean. Itzultzaileak eta argitaletxeak 4.000 euroko saria jasoko dute, erdibana, eta 2.000 euroko laguntza gehigarria ere bai, Euskal Herrira etor daitezen eta literatura-lana argitaratu den herrialdean sustapen lanekin jarrai dezaten.
Etxepare Euskal Institutuak 2015ean sortu zuen Etxepare-Laboral Kutxa Itzulpen Saria, jatorriz euskaraz idatzi eta argitaratutako literatur lan baten urteko itzulpenik onena aitortzeko, eta, harrezkero, Sarrionandiaren galegorako eta katalanerako egokitzapenak, Mussche Kirmen Uriberen eleberriaren japonierazko bertsioa, Behi euskaldun baten memoriak (Bernardo Atxaga) ukraineraratzeko lana eta Amek ez dute Katixa Agirreren eleberriaren nederlanderako itzulpena saritu dituzte.
Kontrako eztarritik. Emakume bertsolarien testigantzak (Lisipe, Susa, 2019) saiakera lanaren katalanezko edizioari buruz epaimahaiak nabarmendu du itzulpena aparta dela "zentzu guztietan", eta erabilitako hizkuntza goraipatu dute, "guztiz benetakoa", "arina" eta "egilearen helburuari modu eraginkorrean" erantzuten diona izateagatik.
Saiakera liburua itzuli duen Estibaliz Lizaso Lopetegui (Tolosa, 1984) itzultzailea eta interpretea da. Esperientzia handia du kulturaren sektorean, eta euskara katalanera eta alderantziz interpretatzeko zerbitzuak eman ditu hainbat ekitalditan, besteak beste, Bertsolari Txapelketa Nagusian. Ingelesezko hainbat idazleren lana euskara ekarri du, hala nola Angela Davis, Dashiell Hammet, Nicholas Blake eta JK Rowling idazleen lanak.
Pol·len edicions Bartzelonako argitaletxe kooperatiboa 2011n sortu zen, eta berrehun liburu inguru plazaratu ditu. Euskaratik katalanera lan gehien itzuli dituen argitaletxea da, eta, bere funtsean, besteak beste, Miren Agur Meabe, Joseba Sarrionandia, Hakaitz Cano, Uxue Alberdi eta Mari Luz Esteban idazleen liburuak aurki daitezke.
Uxue Alberdik Euskadi Literatura Sarietako bat eskuratu zuen 2020an Kontrako eztarritik lanagatik, euskarazko saiakerari dagokiona, hain justu ere.
∞Lotura duten albisteak: