Elgoibarko Udalak zapatuan banatuko ditu Urruzunoko baratzeak, baina aurretik, erabilera araudiari buruzko prestakuntza saio bat emango die erabiltzaileei. 09:30etik 13:30era egingo dute formazio saioa, baratzeetan bertan, eta horren ostean emango dizkiete giltzak erabiltzaileei. Udaletik azpimarratu dute formazio saioa "funtsezkoa" dela lursail eta instalazio komunen erabilera egokia eta arduratsua bermatzeko. "Tailer hau bereziki interesgarria da ez bakarrik lursailen erabilera iraunkorrari buruz ikasteko, baita komunitatearen garrantzia eta hiriko baratzeak mantentzeko lankidetza ulertzeko ere".
Araudia eta funtzionamendua
Herritarren eskura jarri dituzten 28 udal baratzeak erabiltzeko araudia sortu du Udalak, (ikus ARAUDIA). Erabiltzaile bakoitzak armairu bat edukiko du denek erabiliko duten etxola baten barruan. Udalak emandako tresnak erabili ahal izango dituzte, eta biltegi handietan biltegiratutako euri-ura erabiltzen duten ureztatze-sistemak ere bai. Sistema horrek, ureztatze eraginkorra ez ezik, ekologikoa ere bermatzen du. Horrez gain, hondakin organikoetarako konpostagailu komunitario bat ere ipini dute. Debekatuta egongo da ibilgailu pribatuak barrutira sartzea, eta hilabete beroenetan ordutegi zabalagoa izango dute baratzeek. Arauek zehazten dute, halaber, erabiltzaileek osatutako zuzendaritza-batzorde bat eratuko beharko dutela ere, eta hainbat ardura izango dituzte: Udalarekin hartu-emanak, barne-rolak kudeatzea, diruzaintza eta komunikazioa. Erabiltzaileek hiru giltza jasoko dituzte instalazioetarako sarbidea eta beren gauzen segurtasuna ziurtatzeko. Udal baratzeekin nekazaritza ekologikoa sustatu nahi dute, eta ahatik, biodibertsitatearen eta lurzoruaren osasunaren alde egiten duten teknikak soilik erabili ahal izango dituzte erabiltzaileek. Udal ikuskatzaile batek kontrolatuko du hala dela eta erabiltzaileek araudia betetzen dutela, lurzatien eta instalazio komunen jasangarritasuna eta egoera ona bermatzeko.
Aisialdi gunea; zabalik baina amaitzeke
Baratzeen inguruan dagoen haur eta aisialdirako parkea ere zapatuan, hilaren 20an, irekiko dute, baina Udalak zehaztu du barrutiaren sarrerako lanak oraindik egiten ari direla eta datozen asteetan amaitzea espero dutela. Hortaz, herritarrei pazientzia eta arduraz jokatzea eskatu diete Udaleko arduradunek.
