Emakume eta Neska Zientzialarien Nazioarteko Eguna da otsailaren 11a, eta egun horrekin bat egin du aurten ere Elgoibarko Udalak. Elhuyarrekin elkarlanean, bi ekitaldi jarri ditu martxan: Batetik, iaz estreinatu zuren Gu herriko steam emakumeak izeneko erakusketa jarri dute ikusgai Lekuederren. Herriko zortzi emakume zientzialariren biografiekin osatutako panelak hilaren 16ra arte egongo dira ikusgai.
Bestetik, O11 erakuslehioak ekimena jarri dute martxan Egur eta Ane arte tailerrekin elkarlanean. Herriko 24 establezimendutan emakume zientzialarien marrazkiak jarri dituzte. Arte tailer bakoitzak 12 establezimendu apaindu ditu, eta horretarako lanketa berezia egin dute arte eskoletan. Marrazkiak egin eta margotzeaz gain, emakume zientzialari bakoitzari buruzko informazioa ere landu dute ikasleekin, eta zientziaz jarduteko aukera ere izan dute. Bi arte eskoletako arduradunek nabarmendu dute esperientzia oso aberasgarria izan dela, eta zientziari buruzko gauza pila bat ikasi dituztela. Umeak ere oso pozik aritu dira marrazten, eta beraien lanak erakusleihoetan ikusteak are poz handiagoa sortzen die.
Hauek dira establezimenduetan ikus daitezkeen hamabi emakume zientzialariak:
- Ana Zubiaga Elordieta (Forua, Bizkaia, 1959). Biologoa.
- Angela Saini (Londres, Erresuma Batua, 1980). Zientzia-kazetaria.
- Brigitte Baptiste (Bogota, Kolonbia, 1963). Ekologoa
- Uxue Fernandez Lasa (Urretxu, Gipuzkoa, 1984). Jarduera Fisikoaren eta Kirolaren Zientzietako ikertzailea.
- Ana Teresa Diego (Bahía Blanca, Argentina, 1954-1976). Astronomia-ikaslea eta ekintzaile komunista.
- Mary Anderson (Greene, AEB). Asmatzailea eta ekintzailea.
- Miriam Friedman Menkin (Riga, Letonia, 1901-1992). Genetikaria eta enbriologoa.
- Elena Ponciano Paino (Durango, Bizkaia, 1980). Arte Plastikoetako eta Ehungintza Arteko Diseinuko goi-mailako teknikaria. Soldadura eta Galdaragintzako teknikaria.
- Wangari Maathai (Ihithe, Kenya, 1940-2011). Ingurumenaren aldeko ekintzailea eta politikaria.
- Chieko Asakawa (Osaka, Japonia, 1958). Informatikaria.
- Gro Harlem Brundtland (Bærum, Norvegia, 1939). Medikua eta politikaria.
- Maia Duguine Haristoy (Hazparne, Lapurdi, 1979). Euskal hizkuntzalaria.
Gimkanan parte hartzeko aukera
Aurten ere gimkana batean parte hartzeko aukera egongo da. Actionbound aplikazioa dendaz denda jaitsi, 12 emakumeen kartelak bilatu eta bertako QRak eskaneatu ostean, emakumeei buruzko galderei erantzun beharko zaie. Hilaren 16ra arte egongo dira ikusgai.
