Zaborraren gaineko zerga, igoerarik nabarmenena
Kontsumo Prezioen Indizearen (KPI) pareko igoera jasan dute, oro har, ordenantza fiskalek Elgoibarren: %3,7a (2005eko abuztutik 2006ko abuztura pilatutako KPIaren igoera).
Salbuespena, zaborraren gaineko zerga izan da. Elgoibartarrok %20 gehiago ordaindu beharko dugu 2007an sortzen ditugun hondakinen gestioagatik. Igoera handia urte batetik bestera.
PSE-EE eta PP kontra
PSE-EE eta PP alderdiko zinegotziak KPIaren igoera gainditzen ez zuten zerga guztiak onartzearen alde agertu ziren. Aldeko botoa eman zuten baldintza hau bete zen ordenantza fiskaletan. Aldiz, aurkako botoa eman zuten Zaborraren eta Udal Kirol Patronatuaren gaineko zergetan.
Alde bozkatu zutenak ere haserre
EAJ eta EA alderdiko zinegotzien aldeko botoekin onartu zen arren, zaborraren gaineko zergaren igoerarekin haserre agertu zen Gobernu Taldea. Debabarrenako Mankomunitatea jo zuten igoera nabarmen honen erantzule nagusitzat. Jon Zubiaurre Udal-finantzetarako zinegotziak, “mankomunitatearen gestioa hobetu beharrekoa eta hobetzeko modukoa” dela azpimarratu zuen. “Elgoibarri dagokion igoera ez dator bat eskainitako zerbitzuarekin; gehiegizkoa eta bat-batekoegia da-eta” gaineratu zuen.
Igoeraren arrazoiak
Arrazoi bat baino gehiago daude zaborraren gaineko zergaren igoera azal dezaketenak.
1- Mankomunitateko langileen soldaten igoera (negoziaketen bidez lortuak)
2- Elgoibarko Urruzunoko zabortegiaren itxiera. Mankomunitatearen diru sarrerak gutxitu ditu itxiera honek
3- Lapatx-eko (Azpeitia) zabortegian zaborra isurtzeko prezioaren igoerak.
Ikus: Lapatxen zaborra isurtzeko prezioaren igoerak liskarra sortu du udalerrien artean (Uztarria)
Inguruko herrietan zabor bilketak izan dituen igoerak
Eibarren %15,5 igoko dira
Ermuan %22 igoko dira
Donostian %25 igoko dira
320 kilo zabor biztanleko eta urteko
Debabarrenako Mankomunitateak 24 milioi kilo hondakin solido batu zituen 2005ean. Hau da, 320 kilo zabor pertsona eta urteko. Kaleko zabor ontzietan jasotako zaborraz ari gara. Datu hauekin larriturik, mankomunitateak hondakinak gutxitzeko kanpaina jarriko du abian, eta aurki, etxeko postontzian jasoko dugu zabor gutxiago sortzeko hainbat arrazoi eta gomendio aipatzen dituen aldizkaria.
Debabarrenako Mankomunitateko partaideak
Elgoibar, Eibar, Soraluze, Mendaro, Deba, Mutriku, Ermua eta Mallabia.
Udal Kirol Patronatuko abonua %5 igoko da
Bestalde, nabarmentzeko moduko bigarren igoera Udal Kirol Patronatuko zerbitzu eta abonuei dagokiona izango da. Hauek, %5 igoko dira.
Auto-finantzaketa handitzeko beharrean dago igoera honen arrazoia. Zubiaurreren berbetan: “Udal Kirol Patronatuaren finantzaketa gaitasuna %60ra hurbiltzea da gure nahia. Eta aurrerantzean portzentaia hori igotzen joatea. Patronatua osotasunean erabiltzaileek finantzatzera bideratutako igoerak dira”.