Helburua, gainbehera etetea
Elgoibarko merkatu plazak 35 salmenta posturekin ireki zituen ateak, eta eguenetan 60 baserritar etortzen ziren euren produktuak saltzera. Gaur egun hamabi dendarik daukate postua merkatu plazan: hamaikak beheko solairuan eta batek lehenengoan. Eguenetan bi postu gehiago irekitzen dira, eta zenbait baserritar ere etortzen dira. Urteen poderioz, merkatu plazak indarra galdu du, eta hori berreskuratzea da Udalaren nahia.
Hiru proiektu aukeran
Udalak hiru aurre-proiektu aurkeztu dizkie merkatu plazako dendariei. Udalak proposatutakoaren arabera, salmenta postuak handiagoak izango dira eta postu guztiak solairu berean kokatzea proposatu diete dendariei. Hasierako ideiaren arabera,
25m²ko hamabi postu jartzea aurreikusten da, orotara
300 m² izango lituzkeen solairu bakarrean. Modu horretan, dendariek dauzkaten espazio arazoak konponduko lirateke, eta salmenta postuen kokapena egokituta, dendari bakoitzak bere biltegia izango luke postuaren azpian, sotoan; zama-montagailu baten bidez konektatuta. Era honetara, gainera, Merkatu plazako bigarren solairuan geratuko litzatekeen espazioa beste zerbaitetarako aprobetxatzeko aukera legoke.
Barren Azoka elkartea
Merkatu plazako dendariek
Barren Azoka elkartea sortu dute gai horren ardura hartzeko. Bertako kideek azaldutakoaren arabera, ados daude merkatu plaza berria egiteko beharrarekin, baina Udalak oraindik ez omen die proiektuen kostuari buruz ezer esan. Euren esanetan, garrantzitsuena kostu ekonomikoa jakitea da, proiektuarekin aurrera edo atzera egin erabakitzeko.
