Gasteizko tranbiaren “softwarea” sortzeko proiektuan parte hartu du Gorka Landaburuk

elgoibarren.net 2009ko api. 1a, 13:55
Deskargatu Info Ahotsak :

Urte hasieratik martxan dagoen Gasteizko tranbiaren softwarea sortu duen lantaldeko kidea da Gorka Landaburu elgoibartar gaztea (27 urte). “Tranbiaren kutxa beltza litzatekeena sortu dugu” azaldu du Industria-elektronikako goi-mailako ingeniariak. Ordenagailuaren pantailan agertuko zaion informazioa interpretatuz, tranbiak izan ditzakeen funtzionamendu akatsak zuzendu ahal izango ditu langileak, ingeniari talde honek tranbiarentzako bereziki sortu duen hardware eta softwareari esker.


  Tranbiaren burmuina

Lantaldeko kideetako batzuk.

 Mondragon Unibertsitateko lau ikaslek, Traintic enpresako hiru ingeniarik eta beste hiru irakaslek sortu dute elkarlanean ‘tranbiaren burmuina’ moduan aurkez daitekeen softwarea (Ordenagailu-sistema jakin batean erabil daitezkeen programa guztiei erreferentzia egiteko erabiltzen den terminoa). Donostiako Traintic enpresan diharduen Gorka Landaburu euskarri fisiko edo hardwarearen (zirkuituak, txipak, etab.) arduraduna izan da.
 Gasteizko Tranbiak izan ditzakeen arazoen jatorria antzematea da lantalde honek sortu duen gailuaren zeregina, “langileak pantailan begiratuta zerk huts egin duen ulertzeko gai izan zedila nahi genuen. Alegia, arazoa antzeman eta ordenagailuaren pantailaraino eramango zuen sistema, bidea, sortu dugu”.
 Gasteizko tranbiarentzako egin duten analizatzailea “aitzindaria” dela nabarmendu du Landaburuk. Lanean diharduen enpresak, berriz, Bilbo, Bartzelona, Madril, Mallorca, Brusela, Santiago de Chile, Mexiko DF, Sao Paulo eta New Delhiko metroetarako, zein Ankara-Estanbul Abiadura Handiko Trenarentzako proiektuetan ari da lanean. 
∞Lotura duten albisteak:



 
Ekonomia Elgoibar