Honezkero denok, ala ia denok, jakingo duzue Mausitxako gaztak hirugarrengoz irabazi duela Ordiziako Gazta Lehiaketa prestigiotsua. Probatu ere, beharbada, askok egingo zenuten. Bada, hala ez bada; edo berriz probatu nahi baduzue, orain duzue aukera: gazta irabazlearen doako dastaketa eskainiko zaie herritarrei zapatu honetan (irailak 26), hileko azken zapatuko ferian.
•Errekonozimendua Mausitxari eta Txillarreri
Antolatzaileek (Udala eta Debemen) aipamen berezia egin nahi diete
Ordiziako gazta lehiaketako irabazleari eta barazkien arloan bigarren
saria eskuratu zuen Txillarre baserriari. “Errekonozimendu moduko bat
izango da, eta bide batez herritarrei dauzkagun balore edo altxorrak
erakutsi nahi dizkiegu” azaldu du Debemeneko ordezkariak. Honela,
goizeko 11:00etatik aurrera Mausitxako gazta irabazlearen doako
dastaketa eskainiko zaie herritarrei Nafarroa plazan. Dastaketan,
gainera, sagardoa ere banatuko da, Lizundia txabola baserriko sagardoa,
hain zuzen ere. Bi baserriek, Mausitxak eta Txillarrek, Ordizian
irabazitako garaikurrak jarriko dituzte ikusgai.
•Iraileko feria
Bestalde, hilero bezala, hilabeteko azken zapatuko feria ospatuko da
Nafarroa plazan, goizeko 9:00etatik-14:00etara. Elgoibarko zenbait
baserritarrek orotariko nekazal produktuak eskainiko dizkiete
bertaratzen diren guztiei. Arratsaldean, ohiko ganadu eta baserriko
tresneriaren salerosketa-feria egingo da Plaza Txikian. Azkenik,
aipatu, eguna girotzeko, trikitilariak ibiliko direla Elgoibarko
kaleetan zehar.
Ferian parte hartuko duten baserriak: Mausitxa, Txillarre, Lizundia txabola, zabaleta, Arrasketa eta Eguen Txiki.
•Aurrera begirako asmoak
Bertako baserrietako produktuen merkaturatzea da feriaren helburu
nagusiena, “feria baserriko produktuen eskaparate modukoa izan dadila
nahi dugu. Alegia, herritarrak baserriko produktuak erostera ohitu eta
sentsibilizatu”. Asmo horretan, azoka dinamizatzeko eta era berean
elgoibartarrak bertara gerturatzen lagunduko zuten esperoan, hainbat
ekintza antolatzen hasi ziren antolatzaileak duela hilabete batzuk. Hilzorian zegoen feria berrindartzea zen erronka.
Herri kirolen inguruko ekintzak antolatu izan dira orain artean: zaldi
probak, astoa eta gizonen arteko desafioa, herri kirol erakustaldiak, e.a. Aurrerantzean beste modu bateko
ekintzak antolatuko dituztela jakinarazi dute arduradunek: “asteburu
honetako gazta dastaketa, adibidez, edo herriko elkarte gastronomikoek
parte hartuko duten txapelketa gastronomiko bat, akaso”.
