"Dendariek, ostalariek eta herrian eskaintzen diren gainerako zerbitzuek Elgoibarri bizia ematen diotela erakutsi nahi dugu; elgoibartarrak jabetzea horiek guztiak gabe herria hila legokeela”, azaldu du Txankakua Elgoibarko Merkatari eta Zerbitzu Elkarteko arduradun Nerea Erkiagak. BARREN astekariaren azken alean (839. zenbakian) irakur dezakezue Nerea Erkiagari eginiko elkarrizketa (PDF).
Azken hamaika urtean egin izan den Txankakuaren feriaren ordez antolatu du aurten Dendak bizirik! ekimena Txankakuak. Herriko dendetan erostea bultzatzeko hainbat ekimen antolatu dituzte urriaren 4, 5 eta 6 egunetarako. Hala, gaur (urriak 5), 19:00etan, kalejira egingo da trikitilariekin, eta 19:00etatik 22:00ak bitartean batuka talde bat ibiliko da kalez kalez. 20:15ean, berriz, Biraka dantza ikuskizuna ikusteko aukera izango da Kalegoen plazan. Dantzariek erosketa egun bat antzeztuko dute. Eguna bukatzeko, 23:00etan, Zuhaitz Gurrutxaga elgoibartarraren Vanpopel taldeak kontzertua eskainiko du Lekuederren.
•Aurreko denboraldietako erropak, prezio merkeagoan
Zapaturako, hilaren 6rako, stock feria antolatu dute Lekuederren, 10:30etik 14:30era. Aurreko denboraldietako erropak jarriko dituzte salgai, prezio merkeagoan. Pintxo poteoa ere izango da, eta gauean, 23:00etatik aurrera, DJ elgoibartar baten saioa izango da Maalan.