Azken zapatuko feriak eta kontsumo arduratsuaren feriak bat egingo dute zapatuan

 

  Kontsumo iraunkorraren eta arduratsuaren laugarren feriak norbanako, erakunde eta talde askoren parte hartzea edukiko du: Udala, Debemen, Miski, Parrokiako misio taldea, eta, besteak beste, herriko ikastetxeena (Elgoibarko Herri Eskola, Arreiturre institutua eta Elgoibar Ikastola). Azken horietako ikasleek bigarren eskuko produktuak jarriko dituzte salgai: liburuak, jostailuak, imitaziozko bitxiak, apaingarriak, e.a. Era berean, Parrokiako misio taldeak bidezko merkataritzako produktuak salduko ditu, eta Peruko artisau-lanak Miski Gobernuz Kanpoko Taldeak.
Aurrekoez gainera, Elgoibar Berdea kanpainarako Elgoibarko Udalak prestatu zituen poltsa berde berrerabilgarriak erosteko aukera izango dute Lekueder plazara inguratzen diren herritarrek.

•Azken zapatuko feria

Azaroko azken zapatuko nekazaritza feria ere egingo dute zapatuan. Ohiko legez, 9:00etatik aurrera Elgoibarko baserrietako produktuak erosteko aukera egongo da, eta 12:00etatik aurrera Elgoibarko Lagun Taldea txirrindulari elkarteko kideek herriko baserri eta harategietako produktuekin eginiko pintxoak salduko dituzte, euro batean, Kalebarren plazan. 12:30etik 14:30era, berriz, txikienentzako tailerra eskainiko dute Atxutxiamaikako kideek. Argisariekin kandelak egiten irakatsiko diete oraingoan gaztetxoei.
Tailerraz gainera, Aita Agirre plazan ganadu erakusketa egingo dute, eta eguerditik aurrera, Kale Kantariek alaituko dute giroa.

• Azaroaren 30eko feriako egitaraua (PDF)

• Bi feria baten trukean (2011-11-29)
• Kontsumo iraunkorraren aldeko mezua zabaldu zuen zapatuko feriak (2010-11-29)
• Kontsumo Iraunkorraren eta Arduratsuaren I. Feria, azaroaren 27an (2010-11-18)