Eskualdean “ekintzailetza” sustatzea helburu duen Debabarrena Ekinean egitasmoaren barruan, 160 pertsona hurbildu ziren iaz Debegesara enpresa bat sortzeko aholkularitza edota informazio eske, eta kontsulta horien ondorioz, 21 enpresa berri sortzen lagundu zuen Debabarrenako garapen agentziak. Enpresa berri gehienak Eibarren sortu dira, 11, hain zuzen; Elgoibarren 4, Deban 2, eta enpresa bana Soraluzen eta Mutrikun. Azken urteetako datuei erreparatuz gero, Debabarrenean sortu diren enpresa berrien kopurua mantendu egin dela azpimarratu dute Debegesako arduradunek. 2012an esaterako, 22 enpresa berri sortu ziren Debegesaren laguntzarekin.
•37 lanpostu
2013an sortu ziren 21 enpresa berri horiei esker, 37 lanpostu sortu dira, hein handi batean, industria arloko lau enpresa berriren sorrerari esker. Lau enpresa horien artean 11 lanpostu sortu dira. Metalaren sektorekoa da bat, eta gainerako hiru enpresak industria sektore berriei lotutakoak, hala nola, elikagaien transformazioa, ikus-entzunezko produkzioa eta informazioaren industria. Debegesako arduradunen esanetan “positiboak” dira datuok, eta jarduera industrialak enplegua sortzeko duen ahalmena agerian uzten dute. Era berean, Enplegu Planaren eraginkortasuna nabarmendu dute. “Eskualdeko Enplegu Planak ahalbidetu du industria sektoreko lau enpresa hauen sorrera, Debabarrenean proiektu singularrak bultzatzeko egindako ahaleginaren baitan”, adierazi dute.
•Iraupen-tasa altua
Debegesatik esandakoaren arabera, azken bost urteetan sortu diren enpresetatik % 80k jarraitzen dute lanean. "Iraupen-tasa altua da oso, hein handi batean, Debegesak negozio-ideien bideragarritasun analisia egiterako orduan ezartzen duen exijentzia maila altuarengatik”. Ekintzaile edo enpresa berrien sortzaileei dagokienez, 25 eta 45 urte bitartekoak ziren %70, eta gehienak lanik gabe zeuden. Generoari erreparatuta, 2013an enpresa berri bat abian jarri dutenenetatik erdiak emakumeak dira.
•Trebakuntza programak
•120.000 euro diru-laguntzatan enpresa singularrak sortzeko
Iaz enpresa singularrak sortzeko ekimenak lorturiko emaitza “onak” ikusirik, 2014an Debegesak lan-lerro hau indartu egingo du Gipuzkoako Foru Aldundiak onartutako 120.000 euroko diru-laguntzari esker. Diru-hornidura hori enpresa singularrak sortzera bideratuko du Debegesak. Bai Industriari! ekimenarekin bat datozen proiektuak lagunduko dira bereziki, hau da, izaera industriala dutenak edo sektore honi zerbitzua eskaintzen dietenak.
•Berrekin, enpresen transmisioa errazteko ekimena
Debegesako Berrikuntza eta Enpresa Sailak 2014an indartuko duen ekimenetako bat Berrekin izenekoa izango da, enpresen transmisioa erraztea helburu duena. Gipuzkoako Foru Aldundiaren laguntzari esker, Berrekin ekimenaren bitartez negozio baten salerosketan interesa dutenek -euren jarduera transmititzeko interesa duten enpresa txiki eta ertainak zein enpresa-jarduera bati ekin nahi dioten ekintzaileak- aholkularitza juridikoa jaso ahal izango dute dohainik, besteak beste, honako zereginetarako: negozioaren balorazio objektiboa, bideragarritasun analisia, lan-, merkataritza- eta aholkularitza fiskala, etb. Helburua da enpresen transmisioa modu ordenatu eta planifikatuan egitea, proiektuaren jarraipena eta garapena ziurtatze aldera. Informazio gehiago edota ekimenean parte hartu nahi dutenak Debegesarekin harremanetan jar daitezke ekintzaile@debegesa.com helbidera idatziz edo 943 820 110 telefonora deituz.
∞Lotura duten albisteak:
- Enplegua sustatzeko enplegu plana jarri dute abian Debegesak eta Debabarrenako Udalek (2013-04-11)
- Enplegu Planaren aurkezpena egingo dute IMHn (2012-04-25)
- Iaz hamahiru enpresa sortu ziren Elgoibarren, Debegesak lagunduta (2011-05-18)
- Debegesak lagunduta zazpi enpresa sortu dira 2009an Elgoibarren (2010-05-18)
- Zortzi enpresa berri sortzen lagundu zuen Degegesak 2007an (2008-02-28)
- Zortzi mikro-enpresa berri sortu dira Elgoibarren 2006an (2007-01-26)