Iker Amutxastegi zenari eskainitako omenaldi hunkigarriarekin hasi zen atzo 37. Elgoibarko Hiria Txirrinduari Saria, Elgoibarko Lagun Taldea Txirindulari eskolak antolatzen duen junior mailako lasterketa. Minutu bateko isilunea egin zuten eta lora sorta bat eman zioten Amutxastegiren alargunari.
Kalegoen plazatik hasi zen proba 16:00etan, eta 112 txirrindulari batu ziren, tartean Elgoibarko Ciclos Iturriaga taldeko bost txirrindulari. 92 kilometroko ibilbidea osatu zuten, Kalbario mendatea izanik zailtasun handiena. Guztira 75 txirrindularik amaitu zuten proba eta Unai Iribar izan zen azkarrena. Ihes eginda ailegatu zen Santa Klara kalean zegoen helmugara. Irabazleak bi ordu, hamaika minutu eta 46 segundoko denboran egin zituen 92 kilometroak, hau da, batez besteko abiadura orduko 41,89 kilometrokoa izan zen. Urko Semperena (Victor Alvaro Construccion) sailkatu zen bigarren postuan, irabazlearengandik 16 segundora, eta bi segundora ailegatu zen bere taldekide Aketza Arana. Imanol Alvarez elgoibartarra sailkatu zen laugarren postuan, lau iheskideko taldetxoa esprintean menderatuta. Ciclos Iturriaga taldeko gainerako txirrindulariek ere emaitza onak eskuratu zituzten: Jon Astigarraga (11. postua), Mikel Perez de Obanos (15), Jon Ibarluzea (19), Antxon Gisasola (75). Emaitza horiei esker, taldekako sailkapenean hirugarren postua eskuratu zuen Elgoibarko taldeak. (ikus sailkapenak)
• Gipuzkoako selekzioaren deialdian
Gipuzkoako Txirrindularitza selekzioak Lagun Taldeko bi txirrindulari sartu ditu junior mailako taldearen deialdian: Imanol Alvarez eta Jon Astigarraga. Valladoliden jokatuko den proba batean hartuko dute parte Gipuzkoako selekzioa ordezkatuz.
∞Lotura duten albisteak:
- Iker Amutxastegi gogoan izango dute Elgoibarko Hiria Saria txirrindulari proban (2017-03-21)
- Elgoibarko bizilagun Iker Amutxastegi da Azkarateko istripuan hil diren hiru lagunetako bat (2017-03-14)
- Lagun Taldeko jubenilak irabazle Deba eta Azpeitiko lasterketetako taldekako sailkapenetan (2017-03-14)
- Hamazazpi txirrindularirekin hasiko du denboraldia Lagun Taldea Txirrindulari eskolak (2017-02-23)
*Argazkiak: Gipuzkoako Txirrindularitza Federazioa
