Gipuzkoa eta Bizkaiko pinudiak gaixorik daude, eta inguru kaltetuenak Azpeitia eta Errezil ingurua eta Mendaro direla esan berri du Fernando Opakua Gipuzkoako basogintza elkarteko zuzendari teknikoak. Pinus radiata edo Insignis pinua da gaixotu eta gorritu dena, Gipuzkoa, Araba eta Bizkaiko gure mendietan espezierik zabalduena den arbola hain zuzen ere (%33). Edo nahiago bada, basogintza-egurgintza sektorearentzako espezierik errentagarriena dena da hilzorian dagoena, urtetan gure baserritarrentzat ekonomia-iturri nagusia izan dena. Datu bat: gaur egun, Insignis pinua eta eukaliptoa dira gehien aprobetxatzen diren espezieak Euskal Herrian (mozteen %80 eta %13, hurrenez hurren).
Gaitza izugarri azkar ari da zabaltzen eta esan barik doa baserritarrak kezkatuta daudela oso. Baserritarrak diogu, Bizkaiko eta Gipuzkoako mendien %80 jabetza pribatukoak direlako eta baserritarrak direlako jabe horietako asko, Euskadiko Egurraren Elkarteak emandako datuen arabera. Horregatik jo dugu haiengana beste inorengana baino lehen, lehenaz gain -errazik ez zutelako lehen ere- asko ilundu zaielako etorkizuna. Baina ez dira kaltetu bakarrak, jakina, asko direlako basogintza-egurgintza sektoretik bizi direnak gurean: basogintzan dihardutenak, zerretakoak, papergintzakoak, altzarigintzakoak... Pinu egurrak diru asko mugitzen du, eta askori ematen die jaten. Datu eguneraturik ez dago, baina kalkulatzen da egurretarako 10.000 tona bat egur mugitzen dela hemen egunero (500.000 bat euro), eta papererako 2.500 bat tona.
- Erreportajea osorik BARREN aldizkariaren 1087. zenbakian -PDF- (2018-09-07)
