Lasturreko bolatokian jokatu zuten lehen jardunaldian lortutako garaipena errepikatu zuen Xabier Loiolak Iruzubietako bolatokian, Ziortza-Bolibarren jokatutako bigarren jardunaldian. San Migel taldeko bolari elgoibartarrak MX3T taldeko Lander Odiagarekin parrekoak egin eta gero irabazi zuen tiraldia. Irabazleak Solera Eibarrerak emandako ardo botila irabazi zuen saritzat eta Markina Xemeingo Larruz gazta bat ere zozkatu zuten parte hartzaileen artean. Guztira 70 bolarik hartu zuten parte.
• Hirugarren jaurtialdia Elgoibarren
Bi garaipen eskuratuta, sailkapen nagusiko lider dago Xabier Loiola, baina bigarrengoarekiko aldea ez da handiegia, Odiaga baitago bigarren postuan, elgoibartarrak baino hiru txirlo gutxiago botata. Loiolak 14 bota ditu lehen bi jardnaldietan eta 11 Odiagak. Antonio Ibarluzea dago hirugarren postuan, 10 txirlorekin. San Migel taldeko Imanol Osoro eta Jabier Osoro seigarren eta hamargarren postuan daude sailkatuta, hurrenez hurren. Taldeka San Migel A taldea dago aurreneko postuan, 41 txirorekin, Azkoitiako Floreaga taldeak baino 8 txirlo gehiago. Bikotekako sailkapenean bi bikote elgoibartar daude sailkapen nagusiko lehen eta bigarren postuetan: Angel Ibarluzea eta Xabier Loiola eta Imanol Osoro eta Jabier Osoro.
Hurrengo jardunaldia, txapelketako azkenaurrekoa, Idotorbeko bolatokian jokatuko dute zapatuan, azaroaren 9an, 17:00etatik aurrera.
