Azaroko azken zapatuko feria egingo dute zapatuan, azaroaren 30ean, Udalak eta Debemen elkarteak antolatuta. 9:00etatik aurrera bertako baserrietako produktuak jarriko dituzte salgai, eta 11:00etatik aurrera, pintxoak dastatu ahal izango dira Sanlok elkarteak Kalebarren plazan jarriko duen txosnan. Oraingoan ere, Kale Kantariak taldeko kideek eguna girotuko dute 12:00etatik aurrera. Bestalde, 12:00etatik 14:00etara bitartean haur eta gaztetxoentzako talo tailerra egongo da, Lasturko Maitane Beristainek gidatuta. Feria eguna osatzeko, ganadu erakusketa egingo da, eguerditik aurrera, Aita Agirre plazan.