Ligaxkako lau saioetan (Legazpin, Villabonan, Elgoibarren eta Lezon) puntu gehien batu dituzten dantzariek hartu zuten parte Erein elkarteak antolatutako Gazte Mailako III. Aurresku Txapelketa Nagusian.
A sailean (2011tik 2013ra bitartean jaiotakoak) sei dantzarik hartu zuten parte. Txakolin eta Agurra dantzak dantzatu zituzten epaimahaikideen aurrean eta Lezoko Judith Jacinto gailendu zen, 80,40 puntu eskuratuta. Inazio Bereziartua eskolako ordezkari Unax Ansolak eskuratu zuen bigarren postua, 76,30 puntu batuta. Lezon jokatu zen ligaxkako azken saioan ere bigarren postu eskuratu zuen Ansolak. Sasoi betean amaitu du aurresku txapelketen denboraldia.
B sailean (2008-2010), hamabi parte hartzaile izan ziren eta 'Erribera' eta 'Zortzikoa' dantzatu zituzten. Hemen ere Lezoko dantzari batek eskuratu zituen puntu gehien: Mikel Esnaolak; 149,70 puntu. Adin tarte honetan hartu zuen parte Elaia Etxaniz elgoibartarrak. Sail bakoitzean sei sari eman zituzten. Lehenak aginte makilla eta garaikurra jaso zituen; beste bostek garaikurra.
Finalean besteetan baino urduriago aritu zirela dantzan aitortu dute Inazio Bereziartuako irakasleek, baina hori ere irakaspen ona izango da.
• D sailekoen finala, Legazpian
D sailekoek (2006 eta 2007 urtean jaiotakoak) Legazpin dute txapelketa nagusia, ekainaren 19an. Inazio Bereziartua eskolako hiru dantzarik lortu dute finalerako txartela: Malen Galarraga, Jon Etxeberria eta Eneko Etxaniz.
∞Lotura duten albisteak:
- Unax Ansolak bigarren postua lortu zuen Lezoko Soinu Zahar eta Aurresku txapelketan (2021-06-01)
- Eneko Etxanizek irabazi du Elgoibarren jokatu duten Aurresku Txapelketa, bere mailakoetan (2021-05-10)
- Elgoibarko XX. aurresku txapelketa jokatuko dute asteburuan (2021-05-04)
- Eneko Etxanizen bigarren garaipena Gazteen Gipuzkoako Aurresku Txapelketan, oraingoan Villabonan (2021-03-30)
- Elgoibarko eta Lezoko dantzari gazteen aurreskuak nabarmendu dira Aurresku Txapelketaren lehen jardunaldian (2021-03-15)
- Eneko Etxaniz txapeldun eta Markel Goenaga txapeldunorde Elgoibarko Aurresku Txapelketan (2020-10-27)